HIKA i a khuk aa bil mipa cu Steven a si. Amah cu zumh awk tlak mi Jesuh zultu pakhat a si. Sihmanhsehlaw atu cu a cung i a tlung mi hi zoh tuah u! Hi mi hna nih hin lung nganpipi in an cheh. Zeicahdah Steven cu cutluk in an huat i hi tuksapur thil hi a cung ah an tuah? Zoh tuah u sih.

Pathian nih khuaruahhar rian ṭuan awk ah Steven cu a bawmh. Hi mi hna nih hin cucu an duh lo i, cucaah mi hna biatak a cawnpiak mi kong ah amah he cun bia an i al. Sihmanhsehlaw Pathian nih Steven cu fimnak ngan pi a pek i, Steven nih hi mi hna an cawnpiaknak vialte cu a hmaan lo mi lawngte a si ti kha a hmuhsak hna. Cucaah an thin a hung chinchin i amah kha an tlaih i, amah kong i lihbia chim awk ah mi kha an auh hna.

Tlangbawi ngan nih Steven cu: ‘An chim mi cu a hmaan maw?’ tiah a hal. Steven nih Baibal chung in a ṭha ngai mi phungchimnak hmang in a leh. A donghnak ah, hlan lio ah Jehovah a profet hna kha miṭhalo pawl nih an rak huat tawn nak hna kong kha a chim. Cun: ‘Nannih cu khi mi hna bantuk cu nan si. Pathian sal Jesuh kha nan thah i, Pathian nawlbia zong kha nan zul lo,’ tiah a ti hna.

Cucaah khi biaknak lamhruaitu pawl cu an thin a hung ngaingai! An thin hun in an hacang an rial. Sihmanhsehlaw Steven cu cunglei a zoh i: ‘Zoh hmanh u! Vancung ah Pathian orhlei kam ah Jesuh a dir ko kha ka hmuh,’ tiah a ti. Khitikah mi hna cu an kut khan an hna kha an i phih i, Steven kha an zuanhnawh. An tlaih i khualeng ah an chuahpi.

Cuka ahcun an angki kha an phoih i tlangvalpa Saul sin ah khan an pek hna. Saul cu nan hmu maw? Cuhnu ah mi cheukhat nih Steven cu lung in an cheh. Nan hmuh bang hin Steven cu a khuk aa bil i: ‘Jehovah, hi thil ṭha lo an tuah ruang ah hin dan tat sawh hna hlah,’ tiah Pathian sin ah thla a cam. Anmah lak i cheukhat cu biaknak lamhruaitu pawl nih an hruai sual mi hna an si ti a hngalh. Khi hnu ah Steven cu a thi.

Mizeimaw pakhatkhat nih nan cung ah ṭhatlonak an tuah tik ah, nanmah nih maw nan lehrulh tawn hna, asilo ah Pathian dah lehrulh ko hna tiah nan fial tawn? Steven le Jesuh nihcun cubantuk in an tuah lo. An cung i a ṭhalo mi hna cung hmanh ah annih cu an ṭha i vel an ngei. Anmah cu i zohchunh ko hna u sih.