WE DULE sindigar siidi, Esteban nuga. Jesúsba nue nai gudigusmoga. ¡Emisgi ibmar imaglenaid be dage! We dulemar aggwa burwiburwi egi meddenanasulid. ¿Ibiga nue isdar Esteban dagmarsunna, weyob imagnanaidde? Anmar daggoena.

Jehová, Esteban bendagmai gusa, ibmar dagledisulid imaggega. Geb we dulemardi we ibmar isdardagmala, geb abinabin Estebanbo na imaggarmala, Esteban ibmar inniggigwadgi emar odurdagdiid ulale. Auggi Jehová imasa Esteban nue binsaed nigguega, geb Esteban oyosa we dulemar gaggangi emar odurdagdimarye. Aaga we dulemar bur nue saeiddoarmala, geb Esteban gasmala, degi, dulemar bamaladse godsamala Esteban ogaggansamalaga.

Israel sacerdote e dummadga maidi Estebanse egissali: ‘We bega ibmar sognanaidi, ¿bule nue nabirsunna?’ Esteban Bibliagi igar maidba abinsogsa. Nabbidgi sogsa, ebbennegi dule isganamar isdar Bab gaya berbemalad dagsamala. Geb sogde bali: ‘Bemar wemaryob gumarmogad. Jesús, Jehová e mai gued, bemar oburgwismalad, geb babigarmar mamaidba be nanassurmalad’.

¡Emisgi babigargi emar idumalad agga bur saeiddoarmala! Geb saeiddogedba, ar ber nugar gunnagwaled. Auggi Esteban nono onaggwidgua geb sogdegua: ‘¡Be dagge! Bab saggwa nuedsig Jesús gwissi an dagged nibneggi’, we dulemar na uaya moggasmala, degi, Estebangi duurmagdemala. Geb ebibbiale neggwebur magaba onosmala.

Degi na mor asgi yoyoidi unnusmala, geb Sauloga ugsamala edarbega. ¿Be dagsa bia Saulo gwissi? Degiidgi abar dulemar Estebangi aggwa miarmalad. Geb Esteban sindigar sigisa, igi sobaledgi be dagge, degi, Babse goddesunnad: ‘Jehová, we ibmar isgana imagnanaidba mer be aggar imaggo’. Ar edi wisi, abar we dulemar yardagles gudidii babigargi emar idumaladse. We sorbali, Esteban burgwisa.

Dule aggar be imasale, ¿abinsaedgi be binsadae, Babse be godsadae we dule aggalogegardibe? Estebandi geb Jesúsdi deyob imassurmalad. Wemardi anba dulemar sabsur e imasmaladbo nued dae gusmalad. Anmar deyobi daedse imagmogar gebe.