AME cahu trahmany ka sa iwatingöne ca, tre, Setefano. Angeic la ketre atre drei Iesu, ketre atr ka mele nyipici. Ngo hanawang la ewekë ka traqa koi angeic enehila! Kola tranyi angeic hnei itre axöxöp. Pine nemen matre kola methinë Setefano ju pë hë hnene lai itre atr, me trane humuthi angeic hnei etë? Tro sa ce wang la kepin matre angatr a ujë tune lai.

Hnei Akötresie hna aijijë Setefano troa hane kuca la itre iamamanyikeu ka lolo. Hetre itre atr ka thaa madrine kö, celë hi matre, angatr a seikepin la nyipici hnei angeic hna inin kowe la itre atr. Ngo Akötresie la ka hamë Setefano la inamacan ka tru, nge angeic a qaja amaman la itre ini ka thoi, hna hamën hnene la itre atr ka pi isenyin me angeic. Ene pe angatr a elëhni atraqatr. Haawe, angatr a xolouthi angeice ju, me hëne la itre atr matre troa atë la thoi hui angeic.

Hna pane hnying hnene la tane i angetre huuj me hape: ‘Hapeu, nyipici kö la itre ewekë celë?’ Setefano a sa, me hamën la ketre cainöje ka lolo qa hnine la Tusi Hmitrötr. Ame hë ngöne la pune la cainöj, angeice a qaja jë la aqane methinëne ekö la itre perofeta i Akötresie hnene la itre atr ka ngazo. Thupene lai angeic a qaja ka hape: ‘Ceitui nyipunieti hi memine la itre atr cili. Hnei nyipunie hna humuthi Iesu, hlue i Akötresie, nge thaa hane kö nyipunie drengethenge la itre wathebo i Nyidrë.’

Hnene la itre hna ithanata cili hna jele la trenge hni ne la itre hene ne hmi! Ame hna elëhni atraqatr, nge angatr a getre umënyö. Ngo Setefano a gala jë draië me qaja ka hape: ‘Hanawang! Eni a goeë Iesu a cile ngöne la götrane maca i Akötresie e hnengödrai.’ Angatr a thinge ju la itre lue hnangenyë i angatr, me ce uti koi Setefano. Ame hnei angatr hna xöleuthi angeic, me ukapië angeic kowe la tröne la hlapa.

E cili, angatr a una pi la itre ikootre i angatr me hamën troa thupëne itre ej hnene la ketre nekö trahmany, Saulo la ëje i angeic. Öhnyi Saulo hi hnei nyipunie? Haawe, kola nyiqaan hnene la itre xaa atr troa tranyi Setefano hnei etë. Kola sa iwatingöne ca hnei angeic, tune cahu ngöne la iatr, nge angeic a thithi koi Akötresie, me hape: ‘Iehova fe, epi the nyithupene kö hnei Cilieti koi angatr la ewekë ka ngazo celë.’ Atre hi angeic laka, ame la itre xaa ka tranyi angeic, tre, hna amenu angatr hnene la itre hene ne hmi. Thupene lai, Setefano hi a mec.

Maine kola kuca la ketre ewekë ka ngazo koi nyipunie hnene la ketre atr, hapeu, tro nyipunie a thele troa të koi angeic la ngazo i angeic, maine tro pena a sipo Akötresie troa lepi angeic? Thaa celë kö la hna kuca lai hnei Setefano me Iesu. Hnei nyidroti pala hi hna thiina ka loi kowe la nöjei pengön atr, ceitune hi la atr ka loi me ka ngazo thiina koi nyidro. Epi tro fe sa thele troa xötrethenge la tulu i nyidro.