Stefanus ma zepewa nomawe
EHUNGI 107
Stefanus ma zepewa nomawe
OMURUMENDU ngwa woro ozongoro mba oStefanus. Eye wa ri omuhongewa waJesus omuṱakame. Nungwari tara nambano mbi mavi tjitwa ku ye! Ovarumendu mba mave mu vete nomawe omanene. Omena ratjike owo tji ve mu tonda tjinene nao nga tji va tjita otjiṋa otjitirise hi? Indjeye tu tare.
Mukuru aa vatere Stefanus okutjita ovihimise. Ovarumendu mba kava ri nonyuṋe natjo, okutja owo va uta ombata kuna ye mena rokutja aa hongo ovandu ouatjiri. Nungwari Mukuru wa yandja ounongo ouingi ku Stefanus, nu Stefanus wa raisa kutja ovarumendu mba aave hongo ovizeze. Ihi tje ve pindikisira ko. Okutja owo ve mu kambura, nave isana ovandu kutja ve hungire ovizeze ohunga naye.
Omupristeri omunene wa pura Stefanus na tja: ‘Omambo nga ouatjiri poo indee?’ Stefanus we mu zira mokuyandja ehungi ewa okuza mOmbeibela. Komaandero eye wa hungira ohunga nomuano ovarumendu ovarunde mbu va tondere ovaprofete vaJehova moruveze ndwa kapita. Okuzambo arire tja tja: ‘Eṋe mu ri otja ovarumendu mbo. Eṋe mwa zepa omukarere waMukuru Jesus, neṋe kamu puratenene komatwako waMukuru.’
Ihi tja tjita kutja ovanane vozongamburiro ve pindike tjinene! Owo va kweya omayo wawo kumwe mena romazenge. Nungwari okuzambo Stefanus wa ṱumununa otjiuru tje na tja: ‘Tara! Ami me munu Jesus ngwa kuruma kokunene kwaMukuru meyuru.’ Okutja, ovarumendu mba va setika omatwi wawo nomake nave taurire mu Stefanus. Owo ve mu kambura nave mu nanene pendje yotjihuro.
Imbo va hukura ozombanda zawo zokombanda nave ze yandja komurumendu omutanda wena Saulus okuzeṱakamisa. Saulus mo mu munu? Okuzambo ovarumendu tjiva va uta okuveta Stefanus nomawe. Stefanus wa wora ozongoro, otja tji mo munu mba, na kumbu ku Mukuru a tja: ‘Jehova, arikana o ve vere mena rouvi mbwi.’ Eye aa tjiwa kutja tjiva vawo va pukisiwa i ovanane vozongamburiro. Okuzambo Stefanus wa ṱa.
Indu omundu tje ku tjiti otjiṋa otjivi, ove u kondjisa okuvehihamisa wina, poo okuningira Mukuru kutja me ve vere? Stefanus na Jesus katji va tjita. Owo va ri nohange kuna imba mbe ha ri nohange kuna wo. Ngatu kondjise okukongorera otjihorera tjawo.
