HPUT di nga ai wa gaw Stehpan re. Yesu a kangka ai sape langai re. Shi hta hpa byin nga ai hpe yu dat mu. Masha ni gaw shi hpe nlung tawng kaba hte kabai nga ma ai. Stehpan hpe ndai zawn zingri hkra shanhte hpa majaw nju ma ni? Yu yu ga.

Stehpan mauhpa amyu myu galaw lu na matu, Karai Kasang karum ya ai. Ndai masha ni gaw dai hpe nra ma ai. Dai rai nna masha ni hpe teng man ai tara lam sharin ya ai hte seng nna, shi hte dang rang hkat ma ai. Karai Kasang gaw Stehpan hpe nyan hpaji law law jaw ai. Dai masha ni gaw shut ai tara sharin ya nga ma ai, nga nna Stehpan madun dan ai. Dai masha ni gaw grau nna masin pawt wa ma ai. Dai majaw Stehpan hpe magra rim la ma ai. Bai nna shi a lam nteng nman ai hku sakse hkam na matu, masha ni hpe shaga da ma ai.

Hkinjawng agyi kaba wa gaw Stehpan hpe san ai. ‘Shanhte tsun ai ga teng a ni?’ nga ai. Stehpan gaw Chyum Laika hta na grai kaja ai hku hkaw dan ai. Hpungdim daw du wa ai shaloi, moi shawng de na Yehowa a myihtoi ni hpe nhkru ai masha ni kaning rai nju ndawng ma ai lam hpe tsun dan ai. Bai nna: ‘Nanhte mung dai nhkru ai masha ni hte maren sha re,’ nga nna tsun ai. Nanhte Karai Kasang a mayam Yesu hpe sat kau ma ai. Karai Kasang a tara hpe tawt lai ma sai,’ nga nna tsun ai.

Ning nga nna tsun jang makam masham ningbaw ni grai masin pawt ma ai. Grai pawt mayu ai majaw wa udik hkra rai ma ai. Raitimung Stehpan gaw baw sharawt nna, ‘mada yu mu; sumsing lamu hta Karai Kasang a hkra maga de Yesu tsap nga ai hpe ngai mu nngai,’nga nna tsun ai. Dai shaloi dai masha ni gaw shanhte a na pat kau nna, Stehpan hpang de htim sa wa ai. Shi hpe magra la nna mare shinggan de karawt sa wa ma ai.

Dai shara de du jang shanhte a hpun palawng ni hpe raw kau nhtawm, Shawlu ngu ai shabrang ma langai mi hpe sin shangun tawn ma ai. Shawlu hpe mu a ni? Dai hpang e shanhte kaw na masha nkau mi, Stehpan hpe nlung hte kabai ma ai. Ndai kaw mu ai hte maren, Stehpan gaw hput di dat ai. Bai nna: ‘Yehowa e ndai masha ni nhkru ai galaw ma ai hpe mara hkum jaw u,’ nga nna akyu hpyi ai. Shanhte kaw na masha nkau mi hpe makam masham ningbaw ni gaw, masu hkalem tawn ma ai lam shi chye ai. Dai hpang Stehpan si mat wa ai.

Marai langai ngai nanhte hpe nkaja ai hku galaw ai shaloi, nanhte mahtai htang na kun? Shing nrai Karai Kasang ari jaw u ga, nga nna akyu hpyi na kun? Yesu hte Stehpan gaw dai zawn n-galaw ma ai. Shanhte hpe zingri ai masha ni hpe pyi, matsan dum ai. Shanhte a kasi hpe anhte hkan galaw ga.