MŨNDŨ ũũ ũtulĩtye ndu vaa nĩ Sitivini. Nĩ mũmanyĩw’a mũĩkĩĩku wa Yesũ. Ĩndĩ kwasisya ũndũ andũ aa maendee na kũmwĩka! Maendee na kũmũkimanga na mavia manene. Mamũmenete Sitivini mũno wĩana ũu nĩkĩ nginya makavikĩa kwĩka ũndũ ũũ mũthũku? Ekai twone

Ngai nĩwamũtetheeasya Sitivini kwĩka syama sya ũsengy’a. Andũ aa mayendeeaw’a nĩ ũndũ ũsu, kwoou mambĩĩa ũmũkananĩsya ĩũlũ wa kũmanyĩsya andũ ũla w’o. Ĩndĩ Ngai nĩwamũnengie Sitivini ũĩ mwingĩ, na Sitivini oonany’a kana andũ asu meethĩĩtwe maimanyĩsya andũ maũndũ ma ũvũngũ. Ũu watumie mathilĩkĩĩla. Kwoou mamũkwata, na meeta andũ maneene ũvũngũ ĩũlũ wake

Mũthembi mũnene nĩwakũlilye Sitivini: ‘Maũndũ aa nĩ ma w’o?’ Nake Sitivini asũngĩa kwa kũmaelesya ngewa nzeo kuma Mbivilianĩ. Na mũminũkĩlyonĩ wayo, aelesya ũndũ andũ athũku mamenete athani ma Yeova tene. Na ĩndĩ asya: ‘Inyw’ĩ mũilyĩ o ta andũ asu. Mũnoowaie Yesũ mũthũkũmi wa Ngai, na mũyĩw’aa mĩao ya Ngai.

Ũu watumie atongoi asu ma ndĩni mathilĩka mũno! Namo mavevetany’a maeo nĩ woo. Ĩndĩ Sitivini ang’elela ĩtunĩ na asya: ‘Sisya! Nĩona Yesũ aũngamĩte ngalĩ ya kw’oko kwa aũme kwa Ngai ĩtunĩ.’ Ĩndĩ, andũ asu malinda matũ moo na moko moo na mamũsembea Sitivini. Mamũkwata na mamũkusũlany’a mamũtwaa ũtee wa ndũa

Na vau maumya ngũa syoo sya ĩũlũ na mainenga mwanake weetawa Saulo aisũvĩe. We nũmwene Saulo? Na ĩndĩ amwe ma andũ asu mambĩĩa kũmũkimanga Sitivini na mavia. Nake Sitivini atulya ndu, o tondũ ũtonya kwona vaa, na avoya Ngai ayasya: ‘Yeova, ndũkamasilĩle nũndũ wa ũthũku ũũ.’ Sitivini nĩwĩsĩ amwe moo makĩtĩte kũtũndũw’a nĩ atongoi ma ndĩni. Ĩtina wa ũu Sitivini akw’a

Yĩla mũndũ wakwĩka ũndũ mũthũku, we nũtataa kũmũũmĩsya, kana kũvoya Ngai amũũmĩsye? Sitivini na Yesũ mayaaĩka ũu. Nĩmamekaa nesa andũ ala mamekaa naĩ. Nĩtũtatei kũatĩĩa ngelekany’o yoo

Meko 6:8-15; 7:1-60