ЛЪЭГУАЖЬЭМЫЩХЬЭУ щыт мы цІыхухъур Стефанщ. Ар Хьисэ и еджакІуэ пэжщ. Сыт мыгъуэ мыбы иращІэр! МывэкІэ яукІ. Сыту пІэрэ мыбыхэм абы я гур зэребгъауэ мыпхуэдизу гущІэгъуншэу щІаукІыр? ИІэт къэтщІэнти.

Стефан Алыхьым и къарумкІэ къэмыхъуа Іуэху телъыджэхэр ещІэр. Ар мы цІыхухэм я гум ирихькъыми адрейхэр зыхуригъаджэр пцІыуэ хужаІэри ягъэкъуаншэ. Ауэ Алыхьым Стефан Іущагъышхуэ бгъэделъхьэри абы къегъэлъэгъуэф пэж дыдэу пцІым хуезыгъаджэхэр ахэр зэрыарар. Ахэр пцІы хэмылъу абы къегъэгубжь. Абыхэм Стефани къаубыд, пцІы къытезылъхьэхэри къызэхуашэс.

— Ар пэж? — къоупщІ дин пашэшхуэр Стефан. Абы и жэуапу Стефан Библием ипкъ иткІэ абыхэм фІы дыдэу йопсалъэ. ИкІэм деж абы жеІэж цІыху Іейхэм Иеговэ и бегъымбархэр ялъагъу мыхъуу зэрыщытар. Арати жеІэр: «Фэ а цІыхухэм фарещхьщ. Алыхьым и лІыкІуэ Хьисэ фыукІащ, иджыри Алыхьым и унафэхэми федаІуэкъым».

Дин пашэхэм адэкІэ къару лъэпкъ яІэжкъым я губжьыр иракъухыну! Къэгубжьащи, я нэм лъы къытолъадэ. Стефан и щхьэр къеІэтри жеІэр: «Феплъыт! Алыхьым и ижьырабгъумкІэ къыщыту Хьисэ солъагъу». А псалъэхэм емыдэІуэн щхьэкІэ я тхьэкІумэхэр зэхуащІри Стефан зырадз. Къаубыдри къалэм далъэф.

Мыбдеж абыхэм я щыгъынхэр щыщахри, ихъумэну Савл зицІэ щІалэм ират. Сурэтым щыплъагъурэ Савл? ИтІанэ абыхэм ящыщ гуэрхэм Стефан мывэкІэ яукІын щІадзэ. Зэрыплъагъущи, ар лъэгуажьэмыщхьэу мэджалэри Алыхьым йолъэІу: «Иеговэ, мыбыхэм ящІэ Іейм щхьэкІэ тезыр ятомылъхьэ». Абы къыгуроІуэр абыхэм ящыщ гуэрхэр дин пашэхэм къызэрагъэпцІэфар. Абы иужькІэ Стефэн малІэ.

Уэ зыгуэрым Іей гуэр къыщыуищІэм деж абы пэкІуэу лей зэрепхыжыным ухэт, е абы Алыхьым ухуелъэІурэ? Стефани, Хьиси апхуэдэу ящІэтэкъым. Ахэр фІыуэ яхущытт Іей къезыщІэхэми. Дэри абыхэм дазэрыдэплъеиным дыхэтынщ.