ANI li winq wiqʼwo chiru chʼochʼ? Aʼan laj Esteban ut wank choʼq xtzolom li Jesus. Abʼan kʼaʼut yookebʼ xkʼeebʼal chi pek? Xbʼaan naq xikʼ nekeʼril.

Li Yos kixtenqʼa laj Esteban chi xbʼaanunkil li sachbʼachʼoolej. Joʼkan naq ebʼ li winq aʼin, keʼxye re laj Esteban naq kʼaʼut yook chi kʼutuk chirix li Jesus. Li Yos kixkʼe xnaʼlebʼ laj Esteban re xkʼutbʼesinkil naq ebʼ li winq aʼin, inkʼaʼ yookebʼ xkʼutbʼal li yaal chiruhebʼ li qas qiitzʼin. Joʼkan naq keʼnumtaak xjosqʼil ut keʼxchap laj Esteban. Tojaʼ naq, keʼxye re wiibʼ oxibʼ rehebʼ li poyanam naq teʼtikʼtiʼiq chirix laj Esteban.

Li xyuwaʼil laj tij kixye re laj Esteban: ‹Ma yaal li yookebʼ xyeebʼal chaawix?› Laj Esteban kixchʼolobʼ rikʼin li Santil Hu li patzʼom. Naq yook chi raqeʼk xyeebʼal aʼin, kixye naq saʼ li qʼe kutan xikʼ keʼileʼk ebʼ laj kʼanjel chiru li Yos. Joʼkan naq kixye rehebʼ: ‹Laaʼex chanchanex ajwiʼ joʼebʼ li winq aʼin. Xeekamsi li Jesus ut inkʼaʼ keepaabʼ li xchaqʼrabʼ li Yos›.

Naq ebʼ li xbʼeenil aj tij keʼrabʼi aʼin, keʼxkʼuxuxi ruch rehebʼ xbʼaan xjosqʼilebʼ. Laj Esteban kiʼilok saʼ choxa ut kixye: ‹Yookin chi rilbʼal li Jesus saʼ li xnim ruqʼ li Yos!› Abʼan, ebʼ li winq keʼxtzʼap li xikebʼ ut keʼxjukuki laj Esteban. Ut keʼrisi saʼ li tenamit.

Ebʼ li winq keʼrisi li raqʼebʼ ut keʼxkanabʼ chi roq laj Saulo joʼ nakʼutunk saʼ li eetalil. Tojaʼ naq keʼok xkʼeebʼal chi pek. Laj Esteban kixwiqʼibʼ ribʼ ut kiʼok chi tijok chiru li Yos: ‹At Jehobʼa maakʼehebʼ chi xtojbʼal rix li yookebʼ xbʼaanunkil we!› Tojaʼ naq, kikamk. Laj Esteban kixye aʼin, xbʼaan naq naxnaw naq ebʼ li winq keʼbʼalaqʼiik xbʼaanebʼ li xbʼeenil laj tij.

Ma nakaakʼe reqaj li nekeʼxbʼaanu aawe, malaj nakaapatzʼ re li Yos naq tixkʼe chi xtojbʼal xmaakebʼ? Laj Esteban ut li Jesus inkʼaʼ keʼxbʼaanu aʼin. Maajunwa keʼxbʼaanu li maaʼusilal rehebʼ li xikʼ keʼilok rehebʼ. Us wi tqakʼam qe rikʼinebʼ!