MŨNDŨ ũyũ ũturĩtie ndu haha nĩ Stefano. Nĩ mũrutwo mwĩhokeku wa Jesu. No ĩndĩ ta rora ũndũ ũrĩa ũrekĩka harĩ we. Andũ aya maramũhũra na mahiga manene. Nĩ kĩĩ gĩtũmĩte mathũũre Stefano mũno ũũ atĩ nĩ maramwĩka ũndũ ũyũ mũũru? Ta reke tuone.

Ngai nĩakoretwo agĩteithĩrĩria Stefano gwĩka ciama cia magegania. Andũ aya matiakenagio nĩ ũhoro ũcio, na kwoguo makĩambĩrĩria gũkararania nake ũndũ wĩgie kũrũta andũ ũhoro wa ma. No Ngai akĩhe Stefano ũũgĩ mũingĩ, ũrĩa watũmire onanie atĩ andũ aya makoretwo makĩrutana ũhoro wa maheni. Ũndũ ũcio ũgĩgĩtũma marakare makĩria. Kwoguo makĩmũnyita, na magĩĩta andũ nĩgetha marute ũira wa maheni.

Mũthĩnjĩri-Ngai ũrĩa mũnene akĩũria Stefano atĩrĩ: ‘Maũndũ macio nĩ ma ma?’ Stefano agĩcokia na ũndũ wa kũheana mwario mwega wa Biblia. Mũthia-inĩ, akiuga ũrĩa andũ oru maathũũrĩte anabii a Jehova a tene. Agĩcoka akiuga atĩrĩ: ‘Inyuĩ mũhaana o ta andũ acio. Mworagire Jesu ndungata ya Ngai, na mũtiathĩkĩire mawatho ma Ngai.’

Ũndũ ũcio ũkĩrakaria atongoria acio a ndini mũno! Makĩharagania magego mao nĩ ũndũ wa mathirĩ. Rĩu ningĩ Stefano agĩtiira mũtwe wake na igũrũ akiuga: ‘Rorai! Ndĩkuona Jesu arũgamĩte guoko-inĩ kwa ũrĩo kwa Ngai.’ Maigua ũguo, makĩhinga matũ mao na makĩguthũkĩra Stefano. Makĩmũnyita na makĩmũthinĩkania nja ya itũũra.

Rĩu makĩaũra nguo ciao cia igũrũ magĩcinengera mwanake wetagwo Saulu amaigĩre. Nĩ ũrona Saulu? Amwe a arũme acio makĩambĩrĩria kũnyugutĩra Stefano mahiga. Stefano aturirie ndu ta ũrĩa ũrona, na akĩhoya Ngai ũũ: ‘Jehova, ndũkamorie rĩhia rĩrĩ rĩũru.’ Nĩ aamenyaga atĩ amwe ao maahĩtithĩtio nĩ atongoria a ndini. Thutha ũcio Stefano agĩgĩkua.

Rĩrĩa mũndũ agwĩka ũndũ mũũru-rĩ, wee nĩ wĩrĩhagĩria, kana kũũria Ngai akũrĩhĩrie? Ũguo tiguo Stefano kana Jesu meekire. Monanirie tha o na kũrĩ arĩa maamekire ũũru. Rekei tũgeragie kũrũmĩrĩra mũhaano wao.