AWE muntu wafukama pa kikye kipikichala Setepena. Wajinga mwana wa bwanga wa kishinka wa kwa Yesu. Pano akimona kibena kubiwa kwi aye papo! Abe bantu babena kumwasa mabwe akatampe. Mambo ka o bamushikilwa Setepena kya kuba kebamube kintu kyatama bibye? Twaya tumone.

Lesa wamukwashishenga Setepena kuba bya kukumya byawama bingi. Abe bantu kechi batemenwe ne, kino kyalengejile’mba batendeke kumupachika pa byo afunjishenga bantu bukine. Bino Lesa wamupele Setepena maana avula, kabiji Setepena waambile’mba bano bantu bafunjishishenga bya bubela. Kino kibazhingijishe bingi. Kepo bamukwachile, ne kwita bantu kwiya na kwamba bya bubela pe aye.

Ñanga mukatampe wamwipwizhe Setepena amba: ‘Bino ibyo nyi?’ Setepena wakumbwile kupichila mu kwamba jashi jawama bingi ja mu Baibolo. Byo apwishishe kwamba, wibambijile pa mambo a bantu batama bajingako kala byo bashikilwe bangauzhi ba Yehoba. Kepo aambile’mba: ‘Monka mwaubile bashakulu benu ne anweba mo monka. Mwaipayile kalume wa Lesa aye Yesu, kabiji mwakankalwa kulondela mizhilo ya Lesa.’

Kino kyalengejile bano bantangi ba bupopweshi kuzhingila! Bazhingijile ke bashenke ne ku meno. Pakuba, Setepena watajijishe mwiulu ne kwamba’mba: ‘Talai, namona jiulu jashinkuka, ne Yesu kasa aimana ku kilujo kya Lesa.’ Kino kyalengejile boba bantu kushinka mu matwi abo, ne kumuvundumukilatu kya mumo Setepena. Bamukwachile ne kumutajangizha na kukamutaya pangye ya muzhi.

Byo bafikile pangye bavujile minkukumba yabo ne kwiipana ku nsongwalume Saulo amba ebalamineko. Nanchi wamumona Saulo pa kikye kipikichala nyi? Kepo bantu bamo batendekeleko kumwasa mabwe Setepena. Setepena wafukamine panshi byonka byo wamona pape, watendekele ne kulomba kwi Lesa amba: ‘Nkambo, kechi mwibape ano mambo ne.’ Wayukile’mba bamo ba mwi abo bebajimbaikiletu ku bantangi ba bupopweshi. Byo apwishishe kwamba bino, wafwile.

Umvwe muntu wakuba kyatama, nanchi umubwezhezhamo, nangwa kwambila Lesa amba amukozhe nyi? Setepena nangwa Yesu kechi byo byo baubile ne. Bajinga na lusa ne ku boba babujile kwibobila lusa. Twaya tulonde kya kumwenako kyabo.