DI MAN we nil dɔŋ, na Stivin. In na wan pan Jizɔs in disaypul dɛn. Bɔt luk wetin de apin to am naw! Dɛn man ya de sɛn big big ston dɛn pan am. Wetin mek dɛn man ya et Stivin so? Lɛ wi si.

Gɔd bin dɔn de ɛp Stivin fɔ du mirekul dɛn. Dɛn man ya nɔ lɛk we Stivin de du dɛn mirekul ya. So dɛn agyu wit am bikɔs i de tich pipul dɛn di tru bɔt Gɔd. Bɔt Gɔd gi Stivin plɛnti sɛns, ɛn Stivin sho dɛn man ya se na lay lay tin dɛn, dɛn de tich. Dis mek dɛn vɛks pas aw dɛn bin vɛks fɔs. So dɛn ol Stivin ɛn kɔl pipul dɛn fɔ kam lay pan am.

Di ay prist aks Stivin se: ‘Na tru dɛn pipul ya de tɔk?’ Fɔ lɛ Stivin ansa dis kwɛstyɔn, i tɛl dɛn bɔt di tin dɛn we de na di Baybul. I tɛl dɛn bɔt aw sɔm bad pipul dɛn nɔ bin lɛk di prɔfɛt dɛn we Jiova bin de sɛn. Dɔn i se: ‘Una tan lɛk dɛn bad pipul dɛn de. Una dɔn kil Jizɔs, ɛn una nɔ de du wetin Gɔd in lɔ se.’

Dis mek di edman dɛn pan Gɔd biznɛs vɛks bad bad wan! Na de Stivin es in ed, ɛn tɔk se: ‘A de si Jizɔs na ɛvin, i tinap na Gɔd in raytan.’ We i tɔk dis, dɛn kɔba dɛn yes ɛn dɛn rɔn go mit am. Dɛn ol am ɛn drɛg am kɔmɔt na di tɔŋ.

Ɔda pipul dɛn we bin de de, pul dɛn klos we dɛn bin wɛr pantap, ɛn gi wan man we nem Sɔl, fɔ luk am fɔ dɛn. Yu de si Sɔl? Dɔn, di pipul dɛn bigin sɛn ston pan Stivin. Stivin nil dɔŋ, jɔs lɛk aw yu de si na di pikchɔ, ɛn i pre to Gɔd se: ‘Jiova, duya nɔ pɔnish dɛn fɔ dis bad tin we dɛn de du.’ Stivin no se na di edman dɛn pan Gɔd biznɛs dɔn ful sɔm pan dɛn. Afta dat, Stivin day.

We pɔsin du yu bad, yu kin tray fɔ tɔn am gi am, ɔ yu kin pre mek Gɔd pɔnish am? Nɔto dat Stivin bin du, ɛn nɔto dat Jizɔs bin du. Dɛn bin de du gud ivin to di wan dɛn we bin de du dɛn bad. Lɛ wi tray fɔ falamakata dɛn.