ပူ ၁၀၇
စတ့းဖၣ် ဘၣ်တၢ်ကွံာ်သံအီၤ လၢလၢၢ် အဂ့ၢ်
ပှၤလၢအချံးလီၤအခီၣ်န့ၣ် မ့ၢ်စတ့းဖၣ်လီၤ. အဝဲမ့ၢ်ယ့ၣ်ၡူးအပျဲၢ်တဂၤ လၢအသူၣ်တီသးတီတဂၤသၢၣ်. ဘၣ်ဆၣ် ခဲအံၤ အဝဲဒၣ်ဘၣ်မနုၤလဲၣ်န့ၣ် ကွၢ်တဘီ. ပှၤတဖၣ်အံၤ ကွံာ်အီၤလၢ လၢၢ်ကိၢ်လိၢ်ဖးဒိၣ်တဖၣ်လီၤ. ဘၣ်မနုၤအဃိ အဝဲသ့ၣ်သးဟ့စတ့းဖၣ်နးနးကလဲာ် တုၤဒၣ်လဲာ်ဘၣ်မၤအီၤဒ်အံၤန့ၣ်လဲၣ်. ပကကွၢ်သကိးတက့ၢ်.
စတ့းဖၣ်န့ၣ် ယွၤဟ့ၣ်အီၤတၢ်စိကမီၤလၢ ကမၤတၢ်လီၤလးအါမံၤအဂီၢ်န့ၣ်လီၤ. ပှၤတဖၣ်အံၤ တဘၣ်အသးလၢတၢ်န့ၣ်ဘၣ်. တၢ်န့ၣ်အဃိ အဝဲသ့ၣ် ဂ့ၢ်လိာ်ဘှီလိာ်အသးဒီးစတ့ဖၣ် ဘၣ်ဃးလၢ အသိၣ်လိန့ၢ်ပှၤဂၤ တၢ်မ့ၢ်တၢ်တီန့ၣ်လီၤ. ဘၣ်ဆၣ်သနာ်က့ ကစၢ်ယွၤဟ့ၣ်စတ့းဖၣ် တၢ်ကူၣ်ဘၣ်ကူၣ်သ့အါအါကလဲာ်ဒီး အဝဲဒၣ်နဲၣ်ဖျါထီၣ်လၢ ပှၤတဖၣ်အံၤ သိၣ်လိနဲၣ်လိပှၤဂၤ တၢ်တမ့ၢ်တတီတဖၣ်န့ၣ်လီၤ. ဒ်န့ၣ်ဒီး ပှၤတဖၣ်အံၤ အသးဟဲဒိၣ်အါထီၣ်ဝဲဒၣ်န့ၣ်လီၤသၢၣ်. လၢတၢ်န့ၣ်အဃိ အဝဲသ့ၣ်ဖီၣ်အီၤဒီး ကိးပှၤလၢအုၣ်အသးကဘျံးကဘျၣ်တဖၣ် လၢစတ့းဖၣ်အလိၤန့ၣ်လီၤ.
ပှၤလုၢ်တၢ်အခိၣ်ကျၢၢ် သံကွၢ်စတ့းဖၣ်လၢ ‘အဝဲသ့ၣ်စံးတၢ်န့ၣ်ဘၣ်ဧါ’ န့ၣ်လီၤ. စတ့းဖၣ်တခီ, ဟ့ၣ်ဝဲဒၣ်တၢ်စံၣ်တဲၤတဲလီၤအဂ့ၤတခါ လၢအအိၣ်ဒီးလံာ်စီဆှံအတၢ်အုၣ်အသးန့ၣ်လီၤ. တုၤလၢအကတၢၢ်န့ၣ် တဲဖျါထီၣ်ဝဲဒၣ်, ပှၤအၢပှၤသီလၢညါတဖၣ် သးဟ့ဝဲသ့ၣ်ယဟိဝၤအဝံတဖၣ် ဒ်အံၤဒ်နုၤအဂ့ၢ်န့ၣ်လီၤ. ဝံၤဒီး, စံးဝဲ ‘သုဝဲသ့ၣ်စ့ၢ်ကီး သုဒ်သိးသိးအဝဲသ့ၣ်တဖၣ်လီၤ. သုမၤသံကွံာ် ယွၤအခ့အပှၤယ့ၣ်ၡူး ဒီးသုလုၢ်သ့ၣ်ခါပတာ် ယွၤအတၢ်သိၣ်တၢ်သီစ့ၢ်ကီးန့ၣ်လီၤ.’
ဖဲအတဲဝဲဒၣ်ဒ်အံၤအခါ တၢ်ဘူၣ်တၢ်ဘါအခိၣ်အနၢ်တဖၣ် သူၣ်ဒိၣ်သးဖျိးထီၣ်ဝဲသ့ၣ်နးနးကလဲာ် တုၤဒၣ်လဲာ်ဘၣ်အ့ၣ်တဃံးအမဲန့ၣ်လီၤ. သနာ်က့, စတ့းဖၣ် မိာ်ထီၣ်အခိၣ်ဝံၤ စံးဝဲ ‘ကွၢ်တဘီ, ယထံၣ် ယ့ၣ်ၡူးဆၢထၢၣ်လၢ ယွၤအစုထွဲလီၤ.’ တုၤနုၤတစု, ပှၤတဖၣ်အံၤ မၤဘၢအနၢ်ဒီး ဟဲဃ့ၢ်ဝဲသ့ၣ်ဆူ စတ့းဖၣ်အအိၣ်လီၤ. စှီၤဖိၣ်အီၤဒီး ထုထီၣ်ဝဲသ့ၣ်အီၤဆူ ဝ့ၢ်အချၢန့ၣ်လီၤ.
ဖဲအတုၤဖဲန့ၣ်အခါ အဝဲသ့ၣ်ဘီၣ်လီၤကွံာ်အဆ့ကၤလၢအဖီခိၣ်ဒီး မၢဝဲသ့ၣ်ပှၤသးစၢ်တဂၤလၢ တၢ်ကိးအီၤလၢ စီလူး ကခိးန့ၣ်လီၤ. သုထံၣ်စီလူးလၢတၢ်ဂီၤပူၤန့ၣ်ဧါ. ဝံၤဒီး လၢအဝဲသ့ၣ်အကျါ ပှၤတနီၤန့ၣ် ကွံာ်စတ့းဖၣ်လၢလၢၢ်န့ၣ်လီၤ. ဒ်သုထံၣ်ဘၣ်အသိးန့ၣ် စတ့းဖၣ်ချံးလီၤအခီၣ်ဒီး ဃ့ဘါထုကဖၣ်တၢ်, စံးဝဲ ‘ယဟိဝၤဧၢ, တဘၣ်ဟ့ၣ်ကၣ်အဝဲသ့ၣ်အတၢ်ဒဲးဘး လၢအတၢ်အၢအဃိန့ၣ်တဂ့ၤ’ န့ၣ်လီၤ. သ့ၣ်ညါဝဲလၢ ပှၤတဖၣ်အံၤအကျါ ပှၤတနီၤန့ၣ် ဘၣ်တၢ်လီန့ၢ်လွဲန့ၢ်ဃာ်လၢ တၢ်ဘူၣ်တၢ်ဘါအခိၣ်တဖၣ်န့ၣ်လီၤ. တၢ်န့ၣ်အလီၤခံဒီး စတ့းဖၣ်ဘၣ်သံဝဲဒၣ်လီၤ.
ဖဲပှၤတဂၤဂၤမၤအၢသုအခါ သုမၤဆါက့ၤအီၤဧါ, မ့တမ့ၢ် သုဃ့တၢ်လၢ ယွၤကဟ့ၣ်ကၣ်က့ၤအီၤဧါ. စတ့းဖၣ်ဒီးယ့ၣ်ၡူးန့ၣ် တမၤဆၢက့ၤဒုၣ်ဒါဘၣ်. အဝဲသ့ၣ် သူၣ်ဂ့ၤသးဝါလၢ ပှၤမၤအၢအဝဲသ့ၣ်နးနးကျံၤကျံၤတဖၣ်အလိၤ ဒၣ်လဲာ်န့ၣ်လီၤ. မ်ပကလူၤမၤပိာ်ထွဲသကိး အဝဲသ့ၣ်အတၢ်ဒိတၢ်တဲာ်န့ၣ်တက့ၢ်.
