Icisimicisyo 107: Stefano Bamutoba Amabwe
UMWALALUME uufukeme apa ni Stefano. Musambile wa bucetekelo uwa baYesu. Lomba lolesya ifilukucitika kuli ye pano! Aba balalume balukuposa amabwe aakulu pali ye. Mba nindo bamupatile makosa Stefano icakweba’ti balukucite’ci cibipile? Leka tubone.
BaLesa balukofwa Stefano ukucita ifimpelampela ifiweme. Aba balalume tabasangalelepo pali cici, namulifyefyo batatika ukupikisyanya naye pa fialukusambisya abantu icine. Pano baLesa bapela Stefano amano aacilile, kabili Stefano alangisya ukweba’ti aba balalume baalukusambisya ifya bufi. Ici cabalenga ukukalipisya. Popele bamwikata, kabili baita abantu ati balabile ifya bufi pali ye.
Umupapatilisi umukulu aipusya Stefano ati: ‘Kani ifi fintu fya cine?’ Stefano aasuka ukupitila mu kupela ilyasi iliweme ukufuma mu Baibolo. Pakusila kwaliko, alabila ifi abalalume imbifi bapatile abakusimika ba baYehoba akale. Eli alabila ati: ‘Muli koti ni babo abalalume. Mwalipeye baYesu abapyungisi ba baLesa, kabili tamumfwilapo amafunde abaLesa.’
Ici calenga isi ntangisi sya mapempelo ukukalipa ukwakuti. Syasumanya ameno mu bukali. Lomba pano Stefano ainwina umutwi wakwe kwiulu, ne kulabila ati: ‘Boneni! Ndukubona baYesu balimakene kulwine lwa baLesa mwiulu.’ Pali cici abalalume basinka mu matwi abo ne kubutukila kuli Stefano. Bamwikata ne kumukulumwina posonde lya musi.
Kuno abalalume bambi abaliko bafuula amakoti abo ne kuapela ku musankwa Saulu ati aalame. Kani wamubona Saulu? Eli bamo bamo abalalume batatika ukuposa amabwe pali Stefano. Stefano afukama pansi, koti nififi wabona, kabili atembela kuli baLesa ati: ‘BaYehoba, mwibapanika pali cici icakubifya.’ Alisibile ati bambi baalitumpaikilwe ne ntangisi sya mapempelo. Panuma yaceco Stefano afwa.
Ili abantu bacite’cintu icibipile kuli webo, kani ulesya ukubabwelesyamo, neli ukulomba baLesa ati babasomesye? Tacilipo eci Stefano neli baYesu bacitile. Baali ne nkumbu na kuli babo abatababacitile inkumbu. Ngatulukwesya ukutuntulula ifyakubwenako fyabo.
Ifyacitilwe 6:8-15; 7:1-60.
Ifyakwipusya
- Kani Stefano ninani, kabili nifindo ifi baLesa bamofwa ukucita?
- Mba nifindo Stefano alabila ifyalenga intangisi sya mapempelo ukukalipa makosa?
- Ili abalalume bakulumwina Stefano posonde ya musi, kani nifindo bacita kuli ye?
- Mu cikope, kani ninani umusankwa umwanice uwimakene apepi ne makoti?
- Ili tangafwa, kani Stefano atembela ati syani kuli baYehoba?
- Kani tulukufwaya ukutuntulula Stefano, mba nifindo tungacita kani bambi abantu batucitile’fibipile?
Ifyakwipusya na fimbi
- Pendeni Ifyacitilwe 6:8-15
Mba nifindo ifya bufi ifi intangisi sya mapempelo sipyungisya pakwesya ukukanya umulimo wa Bamboni sya baYehoba? (Cit. 6:9, 11, 13)
- Pendeni Ifyacitilwe 7:1-60.
Mba nifindo fyaofwele Stefano ukutulisya bwino icebo iciweme mu Sanikedilini, kabili nifindo tungasambililako ku cakubwenako cakwe? (Cit. 7:51-53; Loma. 15:4; 2 Tim. 3:14-17; 1 Pet. 3:15)
Kani tulyelelwe ukulukubabona syani abakanya umulimo wesu? (Cit. 7:58-60; Mat. 5:44; Luku 23:33, 34)
