Setefwano Navamwasa Malolwa
Chihande 107
Setefwano Navamwasa Malolwa
OU LUNGA nafukama hano ikiye Setefwano. Hikambaji kaYesu wakushishika. Oloze tala ovyo vanakumulinga jino! Ava malunga vali nakumwasa malolwa amanene. Vanamuhungila ika Setefwano numba vamukenyukile ngana? Tutalenu kanawa.
Kalunga napunga nakukafwa Setefwano kukilikita vyuma vyamwaza. Ava malunga vakivo kuvizanga chiku, ngocho hikulipula nenyi jipami hamuchano anakunangula vatu. Oloze Kalunga namuhane Setefwano mangana amavulu, kaha Setefwano hikuvapayisa vano malunga ngwenyi vanapunga nakulongesa makuli. Echi chinavafutula chikuma kumichima. Hikumukwata nakusanyika vatu vamuvangijikile.
Vapilishitu vakulitulaho navamwihula Setefwano ngwavo: ‘Vyumevi vinapu vyamuchano tahi?’ Setefwano hakukumbulula himwahanjika chihande chaMbimbiliya chamwaza. Hakukumisa, mwambulula omu vatu vavapi vajinjile vapolofweto jaYehova kushikulu. Jino ngwenyi: ‘Enu muli nge mwavaze malunga. Mwajihile ngamba yaKalunga, Yesu, kaha kamwononokele jishimbi jaKalungako.’
Vatwamina vamukwitava hikupihilila chikuma! Hikulingenjunga kumazwavo nautenu. Kaha Setefwano himwandula meso enyi mwilu, nakwamba ngwenyi: ‘Talenu! Ngunamono Yesu nemana kulivoko lyaKalunga lyachilyo mwilu.’ Omu nambe ngocho, malunga vano hinavajika mumatwitwi avo nakumuzombokela Setefwano. Hikumukwata nakumulovola mwimbo.
Akuno jino hikuzula mahinavo nakuwahana kuli mukweze Saulu awalame. Wamumono Saulu ngwetu? Jino malunga vamwe hikuputuka kumwasa Setefwano malolwa. Setefwano mwafukama hamavu, nge muze unamumono, kaha nakulomba kuli Kalunga ngwenyi: ‘Yehova, kanda ukavapayishila hachuma chachipi chinoko.’ Nejiva ngwenyi vamwe vanavasowangiza kaha kuli vatwamina vamukwitava. Kufumaho Setefwano hikufwa.
Uno kachi nge mutu nakulingi chuma chachipi, weji kumujinda, chipwe kulomba Kalunga amuhunge nyi? Setefwano naYesu kavalingile ngochoko. Vatetelelele chikuma vaze vahonene kuvatetela vakivo. Twesekenu kuvalondezeza.