Étienne Mor
Zistwar 107
Étienne Mor
SA MISIE ki pe azenou la se Étienne. Se enn fidel disip Jésus. Me gete ki pe ariv li asterla! Sa bann misie-la pe avoy gro-gro ros lor li. Kifer zot deteste Étienne sa kantite-la pou fer enn move kitsoz koumsa? Anou gete.
Bondie finn ed Étienne pou fer bann gran mirak. Sa bann misie-la pa kontan sa ditou, ek zot diskit avek li parski li pe ansegn bann dimounn laverite. Me Bondie donn Étienne enn gran sazes, ek Étienne montre ki sa bann zom-la finn ansegn bann foste. Sa fer zot pli ankoler ankor. Alor, zot trap li, ek fer bann dimounn koz manti lor li.
Gran pret demann Étienne: ‘Eski sa bann kitsoz-la vre?’ Étienne reponn zot kan li fer enn zoli diskour ki baze lor Labib. Alafin, li dir kouma lontan bann move zom ti ena laenn pou bann profet Jéhovah. Lerla, li dir: ‘Zot parey kouma sa bann zom-la. Zot finn touy Jésus, serviter Bondie, ek zot pa’nn obeir So bann lalwa.’
Sa fer bann sef relizie bien ankoler! Zot grins zot ledan ar laraz. Me lerla, Étienne lev so latet, ek dir: ‘Gete! Mo trouv Jésus pe deboute dan kote drwat Bondie dan lesiel.’ Kouma zot tann sa, sa bann misie-la met zot lame lor zot zorey ek zot sot lor Étienne. Zot trap li ek trenn li andeor lavil.
La zot tir zot manto ek zot donn sa enn zenn misie ki apel Saul. Eski to trouv Saul? Lerla, de-trwa parmi sa bann misie-la avoy ros lor Étienne. Kouma to trouve Étienne azenou ek li priye Bondie: ‘Jéhovah pa pini zot pou sa move kitsoz-la.’ Li kone ki bann sef relizie finn anbet sertin parmi zot. Apre sa Étienne mor.
Kan enn kikenn fer twa ditor, eski to esey fer parey ouswa to demann Bondie fer li ditor? Se pa seki Étienne ek Jésus inn fer. Zot ti bon mem anver bann dimounn ki ti move ar zot. Anou esey swiv zot lexanp.
