Stiben Ra Walpa Ni Saban
Sturka 107
Stiben Ra Walpa Ni Saban
WAITNA ai lula kriki ba Stiben. Witin ba Jisas disaipelka kasakkira kum kan. Sakuna kaiki kais witin ra dia taki ba! Naha waitnika nani mita witin ra walpa tara ni sabisa. Dia muni witin nani Stiben ra uba misbara kaiki naku dauki bangwisa? Kaisa kaikaia.
Gâd mita Stiben ra help muni kan sain aihkakira nani ba dauki kaia. Sakuna Stiben kasak tanka ba upla nani ra smalki kan ba, witin nani yamni kaikras kan. Baha mita witin nani Stiben wal blahwi bangwan. Sakuna Gâd mita Stiben ra sins laka ailal yaban, bara naha waitnika nani kunin wal smalki kan ba Stiben bui param ra sakan. Baha dukyara witin nani kau ai kupia sauhki, Stiben ra alkan. Bara upla kum kum ra paiwan Stiben mapara bal kunin aisabia dukyara.
Prîst wihtka ba mita Stiben ra makabi walan: ‘Baha nani aisi ba, rait sa ki?’ Sakuna Stiben ba Baibil aisanka pain kum wal aisi una kahban. Bara tnata kat witin bila, pyu luan ra upla saura nani mita Jehova prapitka nani ra misbara kaiki bangwi kan. Bara pura praki win: ‘Man nani sin baku bangwisma. Gâd napakanka Jisas ra iki bangwram bara man nani Gâd lâka ba sin alki brih bangwras sma.’
Rilidian lalka nani ba naha wali uba ai kupia sauhkan! Baha mita, ai napa nani sut arkbi bangwi kan. Sakuna Stiben ai lal ba purara buki, naku aisan: ‘Kaiki kais! Jisas heven ra Gâd mihta aihkika ra bui ba kaikisna.’ Sakuna waitnika nani ba ai kyama praki, witin ra pruki taun bila wina latara raski sakan.
Bara witin nani ai kwalka ba daikisi, wahma Sâl ra main kaikbia dukyara yaban. Man Sâl bui ba kaikisma ki? Bara waitnika nani kum kum ba mita mahka Stiben ra walpa ni sabi ta krikan. Man kaikisma ba baku witin ai lula kriki naku Gâd ra ai pura sunan: ‘Jehova, naha saurka dukyara witin nani ra saura munpara.’ Stiben nu kan waitnika nani kum kum ba rilidian lalka nani mita kunin munan kan ba. Bara witin baha aisan ningkara pruan.
Upla kum mita saura mai munan sa kaka, man pana saura munaia lukisma ki, apia kaka Gâd ra makabisma witin ra saura munbia dukyara? Stiben bara Jisas sin baku dauki bangwras kan. Witin nani ra saura munan uplika nani ra kat sin yamni muni bangwi kan. Yawan witin nani daukan ba baku daukaia sa.
