TA̱ XÍKUXÍTÍ yóʼo kúú ta̱ Esteban. Iin discípulo ta̱ Jesús kúúra. Soo koto ña̱ ndóʼora. Yu̱u̱ kúúnnara. ¿Ndachun sáa̱ní-inina xínina ta̱ Esteban ta kúúnna yu̱u̱ra? Yóʼo sakuaʼayó xa̱ʼaña.

Ndióxi̱ kúú ta̱ chíndeé táʼan xíʼin ta̱ Esteban ña̱ kéʼéra milagro. Ta na̱yóʼo kǒo kútóona ña̱ kéʼéra milagro, ta ndáʼyi̱na xíʼinra xa̱ʼa ña̱ sánáʼa̱ra na̱ yiví xa̱ʼa ña̱ nda̱a̱. Soo Ndióxi̱ ku̱a̱ʼání ña̱ ndíchi táxira ndaʼa̱ ta̱ Esteban, ña̱kán káʼa̱nra xa̱ʼa na̱yóʼo ña̱ kǒo sánáʼa̱na ña̱ nda̱a̱. Xa̱ʼa ña̱yóʼo ni̱sa̱a̱kana xi̱ninara, saá ndu̱kúna savana ña̱ ka̱ʼa̱nna tu̱ʼun vatá xa̱ʼara.

Ta̱ su̱tu̱ káʼnu ni̱nda̱ka̱tu̱ʼunra ta̱ Esteban: ʼ¿Á ña̱ nda̱a̱ kúú ña̱ káʼa̱nna xa̱ʼún?ʼ, káchira xíʼinra. Ta̱ Esteban va̱ʼaní nda̱kuiinra yu̱ʼu̱ ta̱ su̱tu̱ yóʼo xíʼin ña̱ va̱xi nu̱ú Biblia. Ni̱ka̱ʼa̱nra ku̱a̱ʼání na̱ yiví ni̱sa̱a̱-ini xi̱ni na̱ profeta xi̱naʼá, ta káchira: ʼSaá káatu ndóʼóva. Xa̱ʼníndó ta̱ Jesús ta̱ káchíñu nu̱ú Ndióxi̱, ta kǒo kandíxandó ley Ndióxi̱ʼ.

Sáa̱ní na̱yóʼo, iin ndákaxí nu̱ʼuna ña̱ sáa̱na. Tá nda̱niʼi ta̱ Esteban nu̱úra chí ndiví, káchira: ʼKotondó xítoi̱ ta̱ Jesús níndichira chí ndiví chí ndaʼa̱ kúaʼa Ndióxi̱ʼ, ta na̱yóʼo sásina so̱ʼona ña̱ kǒo kúni̱na kuniso̱ʼona ña̱ káʼa̱nra, tasaá káninara ta ñúunara ku̱a̱ʼa̱nna nda̱a̱ chí nu̱ú ñuu.

Yóʼo távána ti̱ko̱to̱na ta táxinaña ndaʼa̱ ta̱ Saulo ná kundaaraña. Koto nu̱ú na̱ʼná yóʼo níndichi ta̱ Saulo. Ta savana ki̱xaʼána kúúnna yu̱u̱ ta̱ Esteban. Ta̱yóʼo xi̱kuxítíra ta káʼa̱nra xíʼin Ndióxi̱ táki̱ʼva xítoún nu̱ú na̱ʼná yóʼo: ʼJehová kǒo taxiún castigo ndaʼa̱na xa̱ʼa ña̱ kéʼéna xíʼi̱nʼ, káchira. Ta kúnda̱a̱-inira chi sava na̱yóʼo, na̱ su̱tu̱ sa̱ndáʼvi miína. Tándi̱ʼi ni̱ka̱ʼa̱nra ña̱yóʼo ni̱xi̱ʼi̱vara.

Tá iinna íxandi̱va̱ʼa xíʼún, ¿á kúni̱ún ná chaʼvinaña nu̱ún? ¿Á ka̱ʼún xíʼin Ndióxi̱ ná taxira castigo ndaʼa̱na? Ta̱ Esteban xíʼin ta̱ Jesús kǒo ña̱yóʼo níkeʼéna xíʼin na̱ yiví. Chi nda̱a̱ na̱ i̱xandi̱va̱ʼa xíʼinna viíva ni̱xi̱yo inina xíʼinna. Saá xíniñúʼu kooyó.