Kitetenkej Esteban
Tanojnots 107
Kitetenkej Esteban
NEJIN takat tein tankuaijkatok motokaytia Esteban. Yej se imomachtijkauj Jesús tein tatakamatkej. ¡Sayoj ika xikita tein mochiujtok! Nejin takamej kikajkauilijtokej uejueyi tet. ¿Keyej kiteltauelitaj Esteban? Maj tikitakan.
Dios kipaleuiaya maj kichiua uejueyi mouiskatekimej. Uan no kinimachtiaya taltikpakneminij tein melauak, uan nejon takamej amo kiuelitayaj, yejika iuan motajtolteuijkej. Sayoj ika Dios kimakak Esteban ueyi tamatilis, uan kinextij ika nejon takamej tamachtiayaj xolopijyot. Nejon okachi kintelkualantij, yejika kikitskijkej uan kininotskej seki taltikpakneminij maj kitakajkayauilianij Esteban.
Tayekankej tiopixkat kitajtanij: ‘¿Melauj tein kijtouaj?’ Esteban tanankilij ika se kuali tanojnots ika Biblia. Keman matantiayaya, kiniluij ika ne uejkauj takamej amo yolkualmej kintauelitakej itanauatijkauan Dios. Ompa kijtoj: ‘Namejuan no ijkon nankichiuaj. Nankimiktijkej Jesús, itekitikauj Dios, uan amo nankitakamatij itanauatiluan Dios’.
¡Nejon kintelkualantij tayekananij itech taneltokalis! Kemej tel kualantoyaj, tananatskayaj. Sayoj ika, keman Esteban moixajokuik uan kijtoj: ‘¡Xikitakan! Ne iluikak nikita Jesús ijkatok iyekmakopa Dios’. Nejon takamej monakastsajtsakkej uan kikitskijkej Esteban. Kititilatskej uan kiajxitijkej altepetenoj.
Ompa, mokixtilijkej imin taken tein kipiayaj pani uan kikauilijkej telpoch Saulo maj kinpialiani. ¿Tikita Saulo? Satepan, seki takamej peuak kitetemaj Esteban. Yej motankuaketsak, kemej ueli tikita nikan, uan kichiuak netataujtil iuan Dios: ‘Jiova, amo xikintatsakuilti ika nejin tein amo kuali kichiujtokej’. Yej kimatia ika tayekananij itech taneltokalis kinkajkayaujtoyaj sekin, yejika ijkon kichiuayaj. Keman kitamiijtoj nejin, Esteban momikilij.
Keman aksa mitschiuilia teisa tein amo kuali, ¿tiktemoua keniuj timomakepas, oso tiktajtania Dios maj kinchiuili teisa tein amo kuali? Niono Esteban uan Jesús kichiujkej nejon. Yejuan katkaj yolkualmej imiuan taltikpakneminij maski kinchiuiliayaj tein tel amo kuali. Maj timochikauakan no ijkon tikchiuaskej.
