Esteban okimiktijkej ika tetl
TLAPOUALISTLI 107
Esteban okimiktijkej ika tetl
NIN tlakatl tlen motlankuaketok ye Esteban. Ye se imachtijka Jesús akin amo omoxelo inauak. ¡Xikita tlen kipanotok! Ninmej tlakamej kimiktia ika uejueyij tetl. ¿Tleka melauak kikokoliaj uan ijkon kitoktiaj Esteban? Ma tikitakan.
ToTajtsin Dios okipaleuijtoka Esteban pampa ma kichiua uejueyij milagros. Nonmej tlakamej amo okinpaktiaya tlen Esteban okichiuaya, uan okitsatsajtsilijkej uan okiluijkej tleka okinmachtiaya tlaltikpaktlakamej itech tlen melauak. Maski ijkon, toTajtsin Dios okimakak ixtlamatilistli, uan Esteban okiteititi nonmej tlakamej otemachtiayaj tlen amo melauak. Non okachi okinkualani, ik non, okikitskijkej uan okinnotskej sekimej tlakamej pampa ma kijtokan tlen amo melauak itech ye.
Ueyi teopixki okitlajtlani: ‘¿Melauak tlen kijtoaj?’. Esteban otlanankili ika se tlamachtil tlen okikixti itech Biblia. Ijkuak yitlamiskia, okijto yiuejkika miakej tlakamej amo yolkualmej okinkokolijkej iteotlajtojkej Jehová. Uan okijto: ‘Namejuan noijki ijkon nankichiuaj. Onankimiktijkej Jesús, itekipanojka toTajtsin Dios, uan amo nankitlakamati itlanauatiluan toTajtsin Dios’.
¡Nin melauak okinkualani tlayekankej teopixkamej! Ik non, ijkuak Esteban oajkotlachixki okijto: ‘¡Xikitakan! Nikita Jesús kajki iyekma toTajtsin Dios itech iluikak’. Nonmej tlakamej amo okinekiayaj kikakiliskej uan okixtopejkej. Okitilantiajkej uan okiuikakej itenpan non altepetl.
Tlakamej okinmokixtilijkej intlakeuan uan okimakakej Saulo pampa ompa ma kinpixto. ¿Tikita Saulo? Ijkuakon, sekimej tlakamej opejki kimaka Esteban ika tetl. Ye omotlankuaketski, ken tikita itech tlaixkopinal, uan okilui toTajtsin Dios: ‘Jehová, amo xikintlajyouilti pampa kichiuaj nin tlamantli amo kuali’. Ye okimatoka sekimej tlayekankej teopixkamej okinkajkayajkej ninmej tlakamej. Ijkuak ijkon okijto, Esteban omikik.
Ijkuak akaj itlaj amo kuali mitschiuilia, ¿san niman tikneki timomakuepas, noso tiktlajtlanilia toTajtsin Dios ma kitlajyouilti? Nion Esteban nion Jesús amo ijkon okichijkej. Yejuan okatkaj yolkualmej maski okinchiuilijkej tlen sapanoa amo kuali. Tejuan noijki ijkon ma tikchiuakan.
