KO E tagata nei ne fakatokotui ko Setefano. Ko ia ko e tutaki tua fakamooli ha Iesu. Ka e onoono la ke he mena kua tupu ki a ia mogonei! Kua tauliti aki he tau tagata nei e tau maka lalahi a ia. Ko e ha ne vihiatia lahi a lautolu ki a Setefano ati taute e lautolu e mena kelea lahi nei? O mai la ke kitia.

Kua lagomatai he Atua a Setefano ke taute e tau mana ofoofogia. Ne nakai fiafia e tau tagata nei ke he mena ia, ti taufetoko a lautolu mo ia ha kua fakaako e ia e kupu mooli ke he tau tagata. Ka e foaki he Atua ki a Setefano e pulotu lahi, ti fakakite age e Setefano kua fakaako he tau tagata nei e tau mena fakavai. Ne holo ki mua e ita ha lautolu ha ko e mena nei. Ti tapaki e lautolu a ia, mo e ui ke he tau tagata ke o mai ke talahau e tau mena pikopiko hagaao ki a ia.

Ne hūhū e ekepoa ne mua ki a Setefano: ‘Kua mooli kia e tau mena nei?’ Ne tali e Setefano he talahau e lauga mitaki lahi mai he Tohi Tapu. Fakahiku ai, ne tala age e ia na vihiatia he tau tagata kelea e tau perofeta ha Iehova he vahā fakamua. Ti pehē a ia: ‘Kua tatai tonu ni a mutolu mo e tau tagata ia. Ne tamate e mutolu e fekafekau he Atua ko Iesu, ti kua nakai omaoma a mutolu ke he tau fakatufono he Atua.’

Ne ita lahi e tau takitaki lotu ha ko e mena nei! Ne gugu e tau nifo ha lautolu he ita. Ka kua lagaki hake e Setefano e ulu haana ti pehē: ‘Kitiala! Kua kitia e au a Iesu kua tū ke he faahi matau he Atua i luga he lagi.’ He mena nei, kua pāpā e lautolu ha lautolu a tau teliga ti feoho atu ki a Setefano. Ne tapaki e lautolu a ia ti toho ki fafo he maaga.

He mena nei ne utakehe e lautolu e tau tapulu ha lautolu ti age ai ke he fuata taane ko Saulo ke leveki. Kitia nakai e koe a Saulo? Ti kamata e falu ia lautolu ke tauliti aki e tau maka a Setefano. Ne fakatokotui a Setefano, tuga ne kitia e koe, ti liogi ke he Atua: ‘Iehova na e, aua neke fakahala a lautolu ha ko e mena kelea nei.’ Ne iloa e ia ko e falu ia lautolu kua fakapouli he tau takitaki lotu. He mole ai ne mate a Setefano.

Ka taute he taha tagata e mena kelea ki a koe, lali nakai a koe ke fakamamahi a lautolu, po ke ole ke he Atua ke fakamamahi a lautolu? Ne nakai taute pihia e Setefano po ko Iesu. Ne totonu a laua ti pihia foki ki a lautolu ne nakai totonu ki a laua. Kia lali a tautolu ke muitua ke he fakafifitakiaga ha laua.