OMULUME ou ukahi apa watuika konongolo, o Estevau, omulongwa wekolelo wa Yesu. Anthi, tala pahe etyi vekahi nokumulinga. Ovalume ava vekahi nokumuyumba omamanya omanene. Omokonda yatyi vayalela unene Estevau, alo vemulinga otyipuka otyivi ngetyi? Tutalei.

Huku ankho wakuatesako Estevau okulinga omahuviso omanene. Ovalume ava kavetyihandele, iya avatañguna nae mokonda ankho ukahi nokulongesa otyili. Mahi Huku waavela Estevau ounongo omunyingi, iya Estevau alekesa okuti ovalume ava vekahi nokulongesa ounkhembi. Otyo tyevenumanesa vali unene. Moluotyo, vaihana ovanthu opo vatole omatutu kombinga ya Estevau.

O saserdote onene aipulu Estevau okuti: ‘Ovipuka ovio vapopia otyili?’ Estevau akumbulula nelongomona limue ewa Liombimbiliya. Okuhulako, apopi oñgeni ovalume onondingavivi vayala ovauli va Yehova. Iya ati: ‘Onue muelifwa novalume ovo. Muaipaa omuumbili wa Huku Yesu, tupu kamuatavelele ovitumino via Huku.’

Otyo tyanumanesa vali unene ononkhalamutue ombo mbo nongeleya. Avahimbika okukueka komayo nonyengo. Anthi Estevau wayelula omutue wae, apopi okuti: ‘Tala! Ndyiluete Yesu, watalama kokulio kwa Huku.’ Moluotyo, ovalume ava velihitika momakutwi avo avautukila Estevau. Vemukuata avemukokela kondye yepundaumbo.

Valula ovikutu viavo iya aveviavela omukuendye Saulu pala okuviyunga. Saulu umuluete apa? Konyima yotyo, ovalume vamue avahimbika okuyumba Estevau omamanya. Estevau watuika konongolo, ngetyi uluete polutalatu olu iya elikuambela ku Huku okuti: ‘Yehova, uhevehitise mokonda yotyivi etyi vekahi nokulinga.’ Estevau ankho utyii okuti ovalume vamue vayondyua vala no nonkhalamutue mbo nongeleya. Konyima yotyo, Estevau ankhi.

Putyina omunthu umue ekulinga otyipuka tyimue otyivi, okuti nove umukondolela otyivi? Ine moiti ku Huku emulinge omapita? Yesu na Estevau hatyoko valinga. Ovo, ankho vena ohole navana ankho vevelinga omapita. Tuhetekelei ongeleka yavo.