NRENYA ne mɔɔ hoto ɛke la a le Sitivin. Ɔle Gyisɛse ɛdoavolɛ mɔɔ ɔdi nɔhalɛ a. Noko nea mɔɔ bɛlɛyɛ ye kɛkala a! Menli ɛhye mɔ ɛlɛtoto awolɛ mgbole abɔ ye. Duzu ati a bɛkpɔ Sitivin somaa mɔɔ ɔti bɛlɛyɛ debie ɛtane kpole ɛhye a? Maa yɛnlea.

Ɛnee Nyamenle boa Sitivin maa ɔyɛ nwanwane ninyɛne dɔɔnwo. Menli ɛhye mɔ ɛngulo debie zɛhae, ɔti bɛ nee ye zule kpolera wɔ nɔhalɛ ne mɔɔ ɔkilehile menli la anwo. Noko Nyamenle manle Sitivin nyianle nrɛlɛbɛ kpole, na Sitivin manle ɔlale ali kɛ menli ɛhye mɔ kilehile adalɛ ninyɛne. Ɛhye manle bɛvale ɛya kpole kpalɛ. Yemɔti bɛhyele ye, na bɛvɛlɛle menli kɛ bɛrali ɔ nwo dasewia.

Ɛsɔfo kpanyinli ne bizale Sitivin kɛ: ‘Asoo ɛhye mɔ le nɔhalɛ?’ Sitivin luale Baebolo ne anu ɛdendɛlɛ kɛnlɛma mɔɔ ɔmanle la azo ɔbuale edwɛkɛ ne. Wɔ edwɛkɛ ne awieleɛ, ɔhilele kɛzi menli ɛtane kpɔle Gyihova ngapezoma ne mɔ mekɛ tendenle mɔɔ ɛze ɛhɔ la. Akee ɔzele kɛ: ‘Bɛle kɛ menli zɔhane ala la. Bɛhu Nyamenle sonvolɛ Gyisɛse yɛɛ bɛtɛdile Nyamenle mɛla ne azo.’

Ɛhye manle ɛzonlenlɛ nu adekilevolɛma ɛhye mɔ vale ɛya kpole! Bɛ nwo ndinli hwehwenle bɛ kikilikikili zɛhae. Na akee Sitivin dole ɔ nye anwuma na ɔzele kɛ: ‘Bɛnlea! Menwu kɛ Gyisɛse gyi Nyamenle asa fema zo wɔ anwuma.’ Bɛdele ɛhye la, menli ɛhye vale bɛ sa duoduale bɛ nzo na bɛhɔle Sitivin anwo zo nwee. Bɛhyele ye na bɛhwenle ye bɛhɔle suakpole ne kandiba.

Bɛyeyele bɛ adɛladeɛ ne mɔ na bɛvale bɛmanle kpavolɛ ne mɔɔ bɛfɛlɛ ye Sɔɔlo la kɛ ɔnlea zolɛ. Ɛnwu Sɔɔlo ɔ? Akee menli ne bie mɔ bɔle ɔ bo kɛ bɛtoto awolɛ bɛazi Sitivin. Sitivin hotole, kɛmɔ ɛnwu ye la, na ɔzɛlɛle Nyamenle kɛ: ‘Gyihova, fa ɛtane ɛhye kyɛ bɛ.’ Ɛnee ɔze kɛ ɛzonlenlɛ nu adekilevolɛma ne ɛbɛlabɛla bɛ nuhua bie mɔ. Yemɔ anzi Sitivin wule.

Saa awie mɔ yɛ wɔ debie ɛtane a, asoo ɛbɔ mɔdenle kɛ ɛyɛ bɛ bie wɔazie ɔ gyakɛ anu anzɛɛ ɛsɛlɛ Nyamenle kɛ ɔyɛ bɛ bie? Tɛ mɔɔ Sitivin anzɛɛ Gyisɛse yɛle la ɛne. Ɛnee bɛ ti akunlu le kɛnlɛma maa menli bɔbɔ mɔɔ nee bɛ lile ye ɛtane zo la. Bɛmaa yɛbɔ mɔdenle yɛzukoa bɛ neazo ne.