WAJUN achi xuklik are ri Esteban. Jun sukʼalaj rajtijoxel ri Jesús. ¡Chawilampeʼ ri tijan kbʼan che! Wa achijabʼ tijan kkekʼaq nimaʼq täq abʼaj chirij. ¿Suche itzel kkil ri Esteban che tijan kkebʼan wariʼ che? Chqilampeʼ.

Ri Ajawaxel tijan kutoʼ ri Esteban che ubʼanik täq milagros. Wa täq achijabʼ utz ta kkil wariʼ, xechʼojin rukʼ rumal che areʼ xukʼut ri qastzij chike ri winaq. Ri Ajawaxel xuya nimalaj retaʼmbʼäl ri Esteban, tekʼuriʼ areʼ xukʼutu che wa täq achijabʼ xa xkekʼut molon täq tzij. Rumal wariʼ xpe jun nimalaj koyowal, o kiwal, rumal laʼ xkechap bʼik xuqujeʼ xkesikʼij nikʼaj täq winaq rech kkebʼij molon täq tzij chirij.

Ri ajkojol tabʼal toqʼobʼ xuta wariʼ: ‹¿La qastzij ri kekibʼij?› Esteban xuya ubʼixik chike rukʼ jun utzalaj chʼabʼal rech ri Loqʼalaj Pixabʼ. Kʼisbʼal re wariʼ xubʼij che itzel täq achijabʼ itzel xkil ri ajqʼaxal utzij ri Ajawaxel ojer. Tekʼuriʼ xubʼij chik: ‹Ix xaq ixjunam kukʼ. Xikamsaj ri Jesús, rajpatanel ri Ajawaxel, xuqujeʼ kkenimaj ta ri täq utaqonik ri Ajawaxel›, xchaʼ chike.

¡Xpe sibʼalaj koyowal ri täq ajkʼamal bʼe! Rumal ri koyowal, xkekachʼachʼej ri kiware. Chiʼ Esteban xuyek ri ujolom xubʼij wariʼ: ‹¡Chiwilampeʼ! Kinwil ri Jesús takʼal che uxukut ri Ajawaxel pa ri kaj›. Wa täq achijabʼ xketzʼapij ri kixkïn xuqujeʼ xeʼok che ubʼanik kʼäx che ri Esteban. Xkecharej bʼi naj che ri tinamit.

Chilaʼ xkesaj ri täq katzʼyaq tekʼuriʼ xkeya che jun ala ubʼiʼ Saulo rech kuchajej. ¿La tijan kawil ri Saulo pa ri wachbʼäl? Tekʼuriʼ nikʼaj achijabʼ xeʼok che ukʼaqik abʼaj chirij Esteban. Chawilampeʼ pa ri wachbʼäl Esteban xukeʼik tekʼuriʼ xubʼan uchʼawem rukʼ Ajawaxel: ‹Jehová, xaq mabʼan kʼäx chike rumal ri itzelal tijan kkebʼano›. Retaʼm che nikʼaj chike wa täq achijabʼ xa sachom kinoʼj kumal täq ajkʼamal bʼe. Tekʼuriʼ xkam ri Esteban.

Chiʼ kʼo jun winaq kubʼan kʼäx chawe, ¿la kawesaj awoyowal chikij, o kata che ri Ajawaxel che kubʼan kʼäx chike? Esteban xuqujeʼ ri Jesús xkebʼan ta wariʼ. Are xkebʼan utzilal kukʼ ri xkebʼan kʼäx chike. Chqabʼanaʼ qe junam kukʼ.