CHAY qonqorasqa runapa sutinmi Esteban. Payqa Jesuspa discipulonmi. ¡Qaway imanachkankutaq! Kay runakunam rumikunawan choqapachkanku. ¿Imanasqataq Estebanta cheqnispanku kaynata rurachkanku? Qawasunchikyá.

Diosmi Estebantaqa yanaparqa admirakunapaq milagrokunata rurananpaq. Chay runakunaqa manam kusikurqakuchu chaymanta chaymi Estebanwan atipanakurqaku runakunaman allinta yachachisqanmanta. Jehová Diosmi Estebanman yachayta qorqa, hinaptinmi chay runakuna mana allinta yachachisqankumanta nirqa. Chaymi astawanraq piñakuruspanku Estebanta hapirurqaku, hinaspam contranpi rimanankupaq llulla runakunata qayachimurqaku.

Chaymanta sacerdotekunapa jefenmi Estebanta tapurqa: ‘¿Cheqaptachu rimachkanku?’ nispa. Estebanñataqmi Bibliamanta rimaspa kutichirqa. Hinaspam nirqa ñawpa tiempopipas mana allin runakuna Diospa willakuqninkunata cheqnisqankumanta. Nirqataqmi: ‘Qamkunaqa chaynapunim kankichik. Diospa justo Churin Jesustapas wañurachinkichik, hinaspa Diospa leyninta manam kasukunkichikchu’ nispa.

¡Hinaptinmi sacerdotekuna hinaspa jefekunapas astawanraq piñakururqaku! Rabiawanmi Estebanpa contranpi kachupakurqaku. Estebanñataq cielota qawarispa nirqa: ‘¡Qawaychik! Hanaq pachatam rikuchkani, Diospa alleq lawninpim Jesusqa sayachkan’ nispa, chaymi chay runakunaqa rinrinkuta tapakuruspanku waykarurqaku. Hinaspam llaqtapa cantonkama aysarurqaku.

Chaypim capankuta chustukuruspanku Saulo sutiyoq mozowan cuidachirqaku. ¿Saulota rikuchkankichu? Hinaptinmi Estebantaqa runakuna rumiwan choqaparurqaku. Chaymi payqa qawasqaykiman hina qonqorakuykuspa Jehová Diosta mañakurqa: ‘Jehová Dioslláy, amayá castigaychu kay hucha rurasqankumantaqa’ nispa. Payqa yacharqa wakinkunaqa sacerdotekunapa engañasqan kasqankuta. Chaymantañam Estebanqa wañukurqa.

Pipas mana allinta rurasuptikiqa, ¿kutipakunkichu icha Diostachu mañakunki paykunatapas ñakarichinanpaq? Chaynataqa Estebanpas nitaq Jesuspas manam rurarqakuchu. Paykunaqa allin runam karqaku ñakarichiqninkunapaqpas. Chaynayá ñoqanchikpas kasunchik.