LENDVODZA leguce lapha phasi nguStefano. Ingumfundzi waJesu lowetsembekile. Kodvwa asewubuke kutsi kwentekani kuyo manje. Lamadvodza ayigcoba ngematje lamakhulu. Kungani amzonda Stefano, aze ente intfo lembi kangaka kuye? Ase sibone.

Nkulunkulu waniketa Stefano emandla ekwenta timangaliso letinkhulu. Lamadvodza abengakutsandzi loko, ngako azama kumphikisa ngekufundzisa kwakhe bantfu liciniso. Kodvwa Nkulunkulu abemnikete kuhlakanipha lokukhulu, ngako wakwati kuveta kutsi lamadvodza wona abefundzisa emanga. Loku kwawatfukutselisa kakhulu, ngako ambamba ase abita bantfu kutsi bamcambele emanga.

Umphristi lomkhulu wambuta watsi: ‘Ngabe letintfo tiliciniso?’ Stefano waphendvula ngekutsi abeke inkhululmo lemnandzi leyayisekelwe eBhayibhelini. Watsi nasaphetsa inkhulumo yakhe, wabatjela ngendlela bantfu lababi labebabazonda ngayo baphrofethi baJehova kadzeni. Ngako wase utsi: ‘Nani nifanana nalabo bantfu. Nabulala sitfunywa saNkulunkulu, Jesu, futsi anizange niyilalele imitsetfo yaNkulunkulu.’

Batfukutsela kakhulu baholi benkholo, baze bacucudza ngisho nemihlatsi yabo. Kodvwa Stefano yena waphakamisa inhloko yakhe wabuka ezulwini, watsi: ‘Ngibona Jesu eme ngasesandleni sekudla saNkulunkulu.’ Atsi nakeva loko lamadvodza, avele avala tindlebe tawo ngetandla. Ase ayamtselekela, ambamba futsi amhudvulela ngephandle kwelidolobha.

Nawefika lapho, akhumula emajazi awo awanika lijaha lelibitwa ngekutsi nguSawula kutsi liwagadze. Uyambona yini Sawula kulesitfombe? Ngako labanye kulamadvodza bacala bagcoba Stefano ngematje. Waguca phasi, njengoba umbona lapha esitfombeni. Wathandaza kuNkulunkulu watsi: ‘Nkhosi! Ungababeki licala ngaloku lokubi labakwentako.’ Abati kutsi labanyenti babo bebayengwe baholi benkholo. Ngemuva kwaloko Stefano wabese uyafa.

Nangabe lotsite akuphetse kabi, uyamphindziselela yini, uze ucele naNkulunkulu kutsi amjezise? Kodvwa boStefano naJesu abazange bente njalo. Baba nemusa ngisho nakubantfu labebete umusa kubo. Asetame kulingisa sibonelo sabo.