XA̱BIYA̱ bi̱ nasmbátigo̱o̱ nindxu̱u̱ Esteban. Ikhaa nindxu̱u̱ mbáa discípulo ndrígóo Jesús bi̱ naʼni rí jmbu. ¡Mú atayáá rí xtáa ragíʼnuu! Xa̱bekha bugi̱ nuxnáá ga̱jma̱a̱ itsí mba̱ʼu̱. Náa numuu rí nakiʼníin kuyáá mbanda̱ʼkho wéñuʼ Esteban rí nuni xúgi̱ kaʼnii rá. Guʼyáá.

Dios xtáa rambáyúu Esteban mu maʼni mbaʼa milagro rí májánʼ wéñuʼ. Xa̱bekha bugi̱ tsinigunʼ rígi̱, ga̱jma̱a̱ nugiʼdu̱u̱n gajmiún numuu rí ikhaa naʼsngún rí gajkhun xa̱bu̱. Mú Dios naʼni rí Esteban mbaʼyoo wéñuʼ, ga̱jma̱a̱ nasngájma rí xa̱bekha bugi̱ kuwa rusngáa rí minduwaʼ. Rígi̱ naʼni rí makiʼníin itháan, ikha jngó nurugua̱a̱ ga̱jma̱a̱ nutún tikhun xa̱bu̱ mu maguwáʼ guthi rí minduwaʼ ga̱jma̱a̱ numuu ikhaa.

Xa̱bu̱ bi̱ kayá edxu̱u̱ náa ndxajkun naraxi̱: ‹Lá gajkhun rí kuwa ruti xa̱bu̱ ráʼ.› Esteban nariʼña̱a̱ ga̱jma̱a̱ mbá discurso májánʼ dí nagájnuu náa Biblia. Nda̱wa̱á naʼthí rí xú káʼnii xa̱bekha bi̱ ramíjínʼ nikiʼníin mbanda̱ʼkho kuñún xa̱bu̱ gaʼyee ndrígóo Dios bi̱ nikuwa nákha ginii. Naʼthí xóó itháan: ‹Xúʼko̱ má nindxala mangáanʼ. Nixiyáala Jesús, xa̱bi̱i̱ ndrígóo Dios, ga̱jma̱a̱ na̱nguá ninimbala xtángoo ndrígóo Dios›.

¡Rígi̱ naʼni rí makiʼníin wéñuʼ xa̱bu̱ ede̱! Ikhiin nakiʼníin wéñuʼ rí asndu naʼphu̱duun iñúunʼ. Mú índo̱ Esteban nakuxi edxu̱u̱, ikhú naʼthí: ‹¡Gu̱ya̱a̱! Nda̱yo̱o̱ Jesús rí wíji̱ náa ñawun mújúnʼ Dios náa mekhuíí›, xa̱bekha bugi̱ nuruguáá cháʼun ga̱jma̱a̱ nuxnáá Esteban. Nuxmajtaa asndu náa rawunʼ xuajin.

Xa̱bu̱ bugi̱ nurawíi xtíñún rí kaguwunʼ mbajnii ga̱jma̱a̱ nuxnáá rí mañewu̱u̱n dxámá bi̱ nagumbiʼyuu Saulo. Lá nandoo natayáá Saulo ráʼ. Ikhú tikhun xa̱bekha nugi̱ʼdi̱i̱ nuxnáá Esteban ga̱jma̱a̱ itsí. Xóo má tayáá gi̱i̱, ikhaa nasmbátigo̱o̱ ga̱jma̱a̱ naʼtákañuu Dios: ‹Jeobá, xátaxuʼmá castigo náa xa̱bu̱ bi̱ kuwa runi dí ra̱májánʼ›. Ikhaa ndaʼyoo rí xa̱bu̱ ede̱ nini nduwiinʼ tikhuun xa̱bu̱ bugi̱. Nda̱wa̱á Esteban nakháñuu.

Índo̱ mbáa naʼniaʼ dí ra̱májánʼ, lá natani̱i̱ xóo má niʼniaʼ, o natanda̱ʼa̱a̱ Dios makuʼma mbá dí ra̱májánʼ náa ikhaa xá. Esteban ga̱jma̱a̱ Jesús túni rígi̱. Ikhiin ninindxu̱ún májánʼ a̱jkiún asndu gajmiún xa̱bu̱ bi̱ niʼniuun dí ra̱májánʼ wéñuʼ. Guʼgíiʼ guʼyaridáá xkri̱da ndrígu̱ún.