A WANUNA loyi a khizamileko laha hi Stefani. Yena mupizani wo tsumbeka wa Jesu. Kanilezi hi nga wona lezi zi mu humelelako makunu! A vavanuna lava vo hoxa maribye ya hombe hehla kakwe. Hikuyini va mu vengako nguvu Stefani laha ka kuza va maha a nchumu lowu wo tshisa ke? A hi zi woneni.

Nungungulu i vunile Stefani a ku maha zihlamaliso zo rewukisa. A vavanuna lava a va zi ranzi lezo, hikwalaho va kanetisana naye xungetano hi lezi a gonzisako zinene ka vanhu. Kanilezi Nungungulu i nyika wutlhari ga hombe ka Stefani, zonake Stefani a komba lezaku a vavanuna lava va gonzisa zilo za mawunwa. Lezo zi va maha va engetelekana a ku zangara. Hizalezo va mu khoma, va vitana vanhu lezaku va ta wulawulela mawunwa hi yena.

A mupristi wa hombe i wutisa Stefani aku: ‘Lisine zilo lezo ke?’ Stefani i hlamula hi ku nyika a kanelo wo saseka wa lomu ka Biblia. Laha kumbheleni ka wona, yena i wulawula hi lezi a vavanuna vo biha va nga vengisa zona vaprofeti va Jehova kaleloko. Makunu aku ngalo: ‘Nwina mu fanana khwatsi ni vavanuna lavo. Mu dele Jesu a nanza ga Nungungulu, niku a mu ingisangi a milayo ya Nungungulu.’

Lezo zi maha lezaku a varangeli va wukhongeli va zangara nguvu! Va getsela a meno yabye hi zanga ya hombe nguvu. Kanilezi Stefani i tlakusa a hloko yakwe makunu, aku ngalo: ‘Wonani! Nzi wona Jesu na a yimile tlhelweni ga xinene ga Nungungulu le tilweni.’ Zalezo, a vavanuna lavo va vala tindleve tabye hi mandla zonake va tsutsumela Stefani. Va mu khoma va mu kokovisela va huma naye handle ka doropa.

Laho va tlhatlha a mabhaji yabye va ma nyikela ka jaha Saule akuva a ma wonelela. Wa mu wona Saule? Makunu a vavanuna vo kari xikari kabye va sangula ku hoxa maribye hehla ka Stefani. Stefani a khizama, kota lezi u zi wonako, zonake a khongela ka Nungungulu aku: ‘Jehova, u nga va tsayisi hi kota ya kubiha loku.’ Yena wa zi tiva ku ngalo a vo kari xikari kabye va lo kanganyiswa hi varangeli va wukhongeli. Anzhako ka lezo Stefani afa.

Loku munhu wo kari a ku mahela zo biha, u zama a ku mu tlhelisela kubiha, kutani u kombela lezaku Nungungulu a mu tlhelisela kubiha? Lezo a hi zona lezi Stefani kutani Jesu va mahileko. Vona va lo kombisa wunene hambu ni ka lava va nga kala ku kombisa wunene ka vona. A hi zameni ku pimanyisa a xikombiso xabye.