JWAMLUME jwatindiŵeleju ali Sitefano. Jwalakwe ali jwakumkuya Yesu jwakulupicika. Nambo sambano alole yayikumtendecela! Acalumeŵa akumponya maganga gamakulungwakulungwa. Ana ligongo cici akum’ŵenga mnope Sitefano mpaka kuyikana pakumtenda yindu yakogoyayi? Kwende tulole.

Mlungu aŵele mkumkamucisya Sitefano kutenda yakusimonjesya yakusangalasya. Nambo acalumeŵa ngayikwanonyela yeleyi, m’yoyo akutanda kukangana najo pakwamba ya usyesyene wakwajiganya ŵandu. Mlungu akumpa Sitefano lunda lwejinji, soni Sitefano akwalosya acalumeŵa kuti jemanjajo aŵele mkwiganya yindu yaunami. Yeleyi yikwatendekasya kutumbila mnope. M’yoyo akumkamula, soni kaneko akwaŵilanga ŵandu kuti asale yaunami pakwamba ya jwalakwe.

Jwamkulungwa jwa ŵambopesi akum’wusya Sitefano kuti: ‘Ana yindu yeleyi yisyene?’ Sitefano akwanga mwakuŵeceta ngani jambone ja m’Baibulo. Kumbesi kwakwe, akwasalila mwaŵatendele ŵandu ŵakusakala kalakala pakwaŵenga ŵakulocesya ŵa Yehofa. Kaneko akuŵeceta kuti: ‘Jemanja mli mpela ŵandu ŵelewo. Jemanja mwam’wuleje Yesu jwakutumicila jwa Mlungu, soni jemanja ngamkupikanila malamusi ga Mlungu.’

Yeleyi yikwatendekasya acimlongola ŵa dini kutumbila mnope! Akumlumila meno mwangalwe. Nambo Sitefano akwinamukulila mwinani mtwe wakwe, kaneko akuŵeceta kuti: ‘Alole! Ngum’wona Yesu ali ajimi mbali jakumlyo kwa Mlungu kwinani.’ Ndaŵi jijojo, acalumeŵa akuŵika magasa gawo m’mawiwi mwawo, nikumgungumucila Sitefano. Akumkamula nikum’wutila kusa kwa msinda.

Kusa kwa msindaku akuwula mikanjo jawo nikumpa mnyamata jwine lina lyakwe Saulo kuti asamalile. Ana akum’wona Saulo? Kaneko ŵane mwa acalumeŵa akutanda kumponya maganga Sitefano. Sitefano akutindiŵala, mpela mwakum’wonela apanomu, kaneko akupopela kwa Mlungu kuti: ‘Yehofa akapa cilango jemanjaji ligongo lya cakusakalaci.’ Jwalakwe akumanyilila kuti acimlongola ŵa dini ŵalambwisye ŵane mwa ŵanduŵa. Kaneko Sitefano akuwa.

Naga mundu jwine atesile cakusakala cine cakwe kwa wawojo, ana akusalingalinga kum’wucisya, kapena akusam’ŵenda Mlungu kuti am’wucisye mundujo? Sitefano, soni Yesu nganatendaga yeleyi. Jemanjaji ŵaliji ŵandu ŵambone mtima atamose kwa ŵandu ŵaŵaŵengaga. Kwende tulinjelinje kuya cisyasyo cawo.