Ododo 108

I Gudo ma Cito Damaciko

INGEYO anga ma obuto piny i ngom-mi? Meno Caulo. Po ni, en aye ogwoko bongo pa jo ma gucelo Citefano ki gweng. Nen kong dero matar tutwal-li! Ngo mono ma tye ka timme?

I kare ma dong kineko Citefano, Caulo otelo wi jo me dwaro lulub kor Yecu me wanogi. En donyo i ot ki ot ci ywayogi woko ka bologi i mabuc. Pol lupwonnye guringo i boma mukene ci gucako tito lok me “kwena maber” kunnu. Ento Caulo ocito i boma mukene me yenyo lulub kor Yecu. Kombeddi en dong tye i yo me cito Damaciko. Ento, ki i yo, man aye gin me aura ma otimme:

Dero mo oryeny atura ki i polo omenyo kom Caulo. En opoto i ngom, kit ma waneno kany-nyi. Ci dwan mo owaco ni: ‘Caulo, Caulo! Pingo itye ka wanna?’ Jo ma gitye kacel ki Caulo guneno dero-ni dok guwinyo dwan-ni, ento pe giniang gin ma gitye ka waco.

Caulo openyo ni: ‘Rwot, in anga?’

Dwan-ni owaco ni: ‘An Yecu, ma itye ka wano-ni.’ Yecu owaco man pien ka Caulo wano lulub kor Yecu, ci Yecu winyo calo gitye ka wano en kikome.

Caulo kombeddi dong openyo ni: ‘Rwot, omyero atim ango?’

Yecu owaco ni: ‘A malo icit i Damaciko. Kunnu gibititti gin ma myero itim.’ Ka Caulo oa malo ci oyabo wange, en pe romo neno gin mo. Wange oto woko! Pi meno jo ma tye kwede gupeye ki cing ci gutere Damaciko.

Yecu dong oloko ki ngat acel i kin lupwonnyene ma i Damaciko, kun owaco ni: ‘A malo, Anania. Cit i gudo ma gilwongo ni Atir. Peny pi laco mo ma nyinge Caulo i ot pa Juda. An ayero en me bedo laticca mapat.’

Anania oye wot. I kare ma orwatte ki Caulo, en oketo cinge i kome ci owaco ni: ‘Rwot ocwala ni wek wangi oyabbe odoco dok ni ipong ki cwiny maleng.’ Cutcut gin mo ma apada calo nge pok rec opoto ki i wang Caulo, ci en dok ocako neno piny odoco.

Gitiyo ki Caulo i yo mapol tutwal me lok ki dano me rok mapol. En odoko lakwena Paulo, ma wabingeyo lok mapol i kome. Ento mukwongo, kong wanenu gin ma Lubanga ocwalo Petero ni otim.

Tic pa Lukwena 8:1-4; 9:1-20; 22:6-16; 26:8-20.