BUSHE naumwishiba uyu umwaume uuleele pa musebo? Ni Sauli. Nga uleibukisha e wasungile ifya kufwala fya balepoola Stefani amabwe. Bushe naulumona ulubuuto? Cinshi cacitike?

Ilyo Stefani bamwipeye, Sauli e watendeke ukufwaya abasambi ba kwa Yesu pa kuti babepaye. Aleya pa mayanda yabo no kubasenda pa kuti ababike mu cifungo. E ico abasambi abengi babutukiile mu misumba imbi no kuyatendeka ukubila “imbila nsuma.” Lelo Sauli na o aleya mu misumba imbi mu kufwaya abasambi ba kwa Yesu. Ilyo aleya ku Damaseke, kwalicitike icintu cimo ica kupapusha mu nshila.

Shauli amwene fye ulubuuto lwamusanika. E calengele awe pa nshi nga fintu ulemona. Lyena aumfwile ishiwi aliti: ‘Sauli, Sauli! Cinshi ulencushisha?’ Abaume abaali na Sauli balilumwene lulya lubuto, e lyo ne shiwi balilyumfwile. Lelo tabaumfwile ico ishiwi lyalelanda.

Sauli aipwishe ati: ‘Ni mwe bani mwe Shikulu?’

Ishiwi lyatile: ‘Nine Yesu uo ulecusha.’ Icalengele alande ifi, ni co ilyo Sauli alecusha abasambi ba kwa Yesu, Yesu aleumfwa kwati fye eo alecusha.

Lyena Sauli amwipwishe ati: ‘Cinshi mfwile ukucita mwe Shikulu?’

Yesu atile: ‘Ima, kabiye ku Damaseke. Nga wafika kulya balakweba ifya kucita.’ Ilyo Sauli aimine no kwisula amenso, tamwene nangu cimo pantu ninshi napofula! E ico abaume ali nabo bamwikete pa kuboko no kumutungulula ku Damaseke.

Yesu aebele umusambi wakwe uwaleikala ku Damaseke ati: ‘Anania, kabiye mu musebo uo beta ati Uwaololoka. Uyefwaya Sauli pa ng’anda ya kwa Yuda. Nimusala ukuba umubomfi wandi uwaibela.’

Anania alicitile ifyo bamwebele. Ilyo Anania amonene na Sauli, alimwikete no kumweba ati: ‘Shikulu nantuma kuli iwe pa kuti utendeke ukumona na kabili, no kukwata umupashi wa mushilo.’ Apo pene fye mu menso ya kwa Sauli mwafumine ifyali kwati mamba kabili ilyo line fye alitendeke ukumona na kabili.

Sauli alibombele sana umulimo wa kushimikila mu fyalo ifingi. Abantu batendeke ukumwita abati umutumwa Paulo. Tuli no kusambilila na fimbi pali ena. Lelo natubale tulande pa fyo Lesa aebele Petro ukucita.