Stori 108: Long Rod We i Go Long Damaskes
?YU SAVE hu ya i stap slip long graon long pija ya? Hemia Sol. Tingbaot se, hem nao we i bin holem kot blong ol man we oli stonem Steven. !Traem luk bigfala laet ya we i stap saen! ?Wanem i stap hapen long ples ya?
Afta we Steven i ded, Sol i lidim ol man nogud blong oli faenem ol man blong Jisas mo kilim olgeta. Hem i go long haos blong olgeta, i karemaot olgeta, i sakem olgeta long kalabus. Plante disaepol oli ronwe i go long ol narafala taon, nao oli talemaot “gud nius” long ol taon ya. Be Sol i go long ol narafala ples ya tu, i stap lukaot ol man blong Jisas. Long pija ya, hem i stap go long Damaskes. Be long rod, wan narakaen samting i kamaot.
Wantaem nomo, wan bigfala laet i kamaot long skae, i saen long Sol. Sol i foldaon long graon, olsem yu luk long pija ya. Nao wan voes i kamaot long skae i se: ‘!Sol, Sol! ?Weswe yu stap mekem i nogud long mi olsem?’ Ol man we oli biaen long Sol, oli luk laet ya mo oli harem tok ya, be oli no kasem save long wanem we oli harem.
Sol i askem se: ‘?Masta, yu yu hu ya?’
Voes ya i talem se: ‘Mi Jisas ya we yu yu stap mekem i nogud long mi.’ Jisas i talem olsem from we, taem Sol i mekem i nogud long ol man blong Jisas, i olsem we hem i stap mekem i nogud long Jisas stret.
Nao Sol i askem long hem se: ‘?Masta, bambae mi mas mekem wanem?’
Jisas i talem long hem se: ‘Yu girap, yu go long taon ya Damaskes. Long ples ya, wan man bambae i talemaot long yu, wanem samting we yu yu mas mekem.’ Nao Sol i stanap bakegen, i openem ae blong hem, be hem i no save lukluk. !Hem i blaen! From samting ya, ol man we oli wokbaot wetem hem, oli holem han blong hem, oli lidim hem i go long Damaskes.
Nao Jisas i toktok long wan disaepol blong hem long Damaskes i se: ‘Ananaeas. Yu girap, yu go long rod ya we nem blong hem Stret rod. Yu go long haos blong Judas, yu askem wan man, nem blong hem Sol. Mi mi jusumaot hem finis, blong hem i kam wan spesel man blong wok blong mi.’
Ananaeas i obei long tok ya. Hem i faenem Sol, i putum han blong hem long Sol, nao i talem se: ‘Masta blong yumi i sanem mi mi kam long ples ya blong mekem ae blong yu i kam gud bakegen, mo blong tabu spirit i kam fulap long yu.’ Nao wantaem nomo, samting olsem skal blong fis i kamaot long ae blong Sol, i foldaon, mo ae blong hem i kam gud bakegen.
Jisas i yusum Sol blong mekem bigfala wok blong prij long ol man blong ol narafala kantri. Ol man oli singaot hem se aposol Pol. Bambae yumi lanem plante moa samting yet long saed blong hem. Be fastaem, bambae yumi luk wanem wok we God i givim long Pita.
Ol Wok 8:1-4; 9:1-20; 22:6-16; 26:8-20.
Ol Kwestin
- ?Sol i mekem wanem afta we oli stonem Steven i ded?
- ?Taem Sol i stap long rod i go long Damaskes, wanem narakaen samting i hapen?
- ?Jisas i talem long Sol blong i mekem wanem?
- ?Jisas i talem wanem long Ananaeas? ?Wanem i mekem se Sol i save lukluk bakegen?
- ?Ol man oli singaot Sol long wanem nem? ?Jisas i yusum Sol blong mekem wanem?
Sam narafala kwestin
- Ridim Ol Wok 8:1-4.
?Olsem wanem ol trabol we ol man oli mekem agens long Kristin kongregesen we i jes stanap, i givhan blong mekem Kristin skul i kasem plante moa ples? ?Wanem samting i hapen long taem blong yumi we i klosap sem mak? (Wok 8:4; Aes. 54:17)
- Ridim Ol Wok 9:1-20.
?Wanem trifala wok we Jisas i talem se Sol i mas mekem? (Wok 9:15; 13:5; 26:1; 27:24; Rom 11:13)
- Ridim Ol Wok 22:6-16.
?Olsem wanem yumi save mekem olsem Ananaeas? ?From wanem samting ya i impoten? (Wok 22:12; 1 Tim. 3:7; 1 Pita 1:14-16; 2:12)
- Ridim Ol Wok 26:8-20.
?Olsem wanem fasin blong Sol blong jenis i kam wan Kristin i save leftemap tingting blong ol man mo woman tede we hasban no waef blong olgeta i no stap long trutok? (Wok 26:11; 1 Tim. 1:14-16; 2 Tim. 4:2; 1 Pita 3:1-3)
