Maana 108nan

Damasi sira kan

CƐ MIN filɛ duguma, i b’a dɔn wa? Saul don. I hakili jigin ko ale de ye Etiɛni fagabagaw ka dulokiw kɔlɔsi. E ka nin yeelenba lajɛ! Mun de bɛ ka kɛ tan?

Etiɛni fagalen kɔfɛ, Saul wulila Yesu ka kalandenw kama, k’u tɔɔrɔ. A tun bɛ taa du ni du ka u sama ka taa ni u ye kaso la. Kalanden caman bolila ka taa dugu wɛrɛw la, ka ‘kibaru duman’ waajuli daminɛ o yɔrɔw la. Nka, Saul taara Yesu ka kalandenw ɲini dugu wɛrɛw la. A bɛ ka taa sisan Damasi. Nka, kabako dɔ kɛra sira kan.

Yeelen dɔ sinna ka bɔ sankolo la, ka na Saul fan bɛɛ la. Saul binna duguma i ko an ɲɛ b’a la cogo min na ja kan yan. Kumakan dɔ bɔra ko: ‘Saul, Saul! Mun na i bɛ ne tɔɔrɔ?’ Saul taamaɲɔgɔnw ye yeelen ye, ka kumakan mɛn, nka kuma min fɔra, u ma se k’o faamu.

Saul ko: ‘E ye jɔni ye Matigi?’

Kumakan ko: ‘Ne ye Yesu ye, i bɛ ka min tɔɔrɔ.’ Yesu ye o fɔ bawo ni Saul bɛ Yesu ka kalandenw tɔɔrɔ, a bɛ i ko a bɛ ka ale yɛrɛ de tɔɔrɔ.

 Saul ko sisan sa: ‘Matigi, ne ka kan ka mun kɛ?’

Yesu ko: ‘Wuli, i ka don Damasi dugu kɔnɔ. I ka kan ka min kɛ, o bɛna fɔ i ye yen.’ Saul wulila tuma min na, k’a ɲɛw yɛlɛ, a ma se ka fosi ye tun. A kɛra fiyentɔ ye. A taamaɲɔgɔnw y’a bolo minɛ ka don ni a ye Damasi dugu kɔnɔ.

Yesu ye nin ci fɔ a ka kalanden dɔ ye min bɛ Damasi: ‘Wuli Ananiyasi. Taa nbɛda la min bɛ wele ko Tilennen. Cɛ dɔ bɛ Juda ka so kɔnɔ min tɔgɔ ko Saul. I ka o ko ɲininka. Ne ye o cɛ sugandi ka kɛ ne ka baarakɛla kɛrɛnkɛrɛnnen ye.’

Ananiyasi y’a kɛ i ko Yesu y’a fɔ a ye cogo min na. A ye Saul sɔrɔ yen tuma min na, a ye a bolo da Saul kan, k’a fɔ ko: ‘Matigi ye ne ci walisa i ka se ka yeli kɛ kokura ani i ka fa hakili senu na .’ O yɔrɔnin bɛɛ la, fɛn dɔ sinna ka bin ka bɔ Saul ɲɛw na. O fɛn tun bɔlen bɛ jɛgɛ fara fɛ. Saul ye yeli kɛ kokura.

Saul kɛra baarakɛminɛn barikama ye walisa ka siya caman mɔgɔw waaju. Kɔfɛ, a nana dɔn ni ciden Paul tɔgɔ de ye. An bɛna fɛn caman kalan a ko la. Nka, an bɛna fɔlɔ k’a lajɛ Ala ye Piɛrɛ ci a ka taa baara min kɛ.

Kɛwalew 8:​1-4; 9:​1-20; 22:​6-16; 26:​8-20.