ÈSKE w konn kiyès ki blayi atè a ? Se Sol. Sonje byen, se li menm yo te bay siveye manto mesye ki t ap lapide Etyèn yo. Gade limyè ki klere a ! Ki sa ki pase ?

Lè yo fin touye Etyèn, Sol pran latèt pou l pèsekite disip Jezi yo. Li mache kay an kay pou l pran yo met nan prizon. Anpil disip kouri al nan lòt vil pou y al preche “ bon nouvèl ” la. Men, Sol al chèche disip Jezi yo nan vil kote y ale yo. Kounye a, li mete tèt pou Damas. Men, etan li nan wout, gen yon bagay etonan ki rive.

Bridsoukou, gen yon limyè ki sot nan syèl la ki klere toutotou Sol. Li sot tonbe atè jan w ap gade l la a. Menm kote a, gen yon vwa ki di : ‘ Sol, Sol ! Poukisa w ap pèsekite m ? ’ Mesye ki avèk Sol yo wè limyè a, e yo tande vwa a. Men, yo pa konprann sa vwa a di.

Sol mande : ‘ Kiyès ou ye, Seyè ? ’

Vwa a reponn : ‘ Mwen se Jezi, sila w ap pèsekite a. ’ Jezi di sa paske lè Sol pèsekite disip Jezi yo, Jezi santi kòmsi se li menm y ap pèsekite.

Epi Sol di konsa : ‘ Ki sa pou m fè, Seyè ? ’

Jezi di l : ‘ Leve, al Damas, y a di w sa pou w fè. ’ Lè Sol leve, li ouvè je l, li pa ka wè anyen. Li vin avèg ! Mesye ki avèk li yo kenbe men l, yo mennen l Damas.

Kounye a, Jezi pale avèk yon disip li ki rete Damas, li di l : ‘ Anànyas, ale nan ri yo rele Dwat la. Antre lakay Jida, mande pou yon moun ki rele Sol. Mwen chwazi l pou l vin yon sèvitè espesyal pou mwen. ’

Anànyas obeyi. Kou l wè Sol, li depoze men l sou li, li di l : ‘ Se Seyè a ki voye m pou w ka wè ankò e pou w ka ranpli ak lespri sen. ’ Menm kote a, gen yon pakèt ti moso bagay tankou kal ki soti nan je Sol. Li kapab wè ankò.

Jezi te sèvi ak Sol anpil pou l preche moun nan anpil nasyon. Se li ki te vin apot Pòl la. Nou pral aprann pi plis bagay sou li. Anvan sa, ann wè ki saBondye voye Pyè al fè.