Saulus ma i koDamaskus
EHUNGI 108
Saulus ma i koDamaskus
OVE mo tjiwa kutja ouṋe ngwa rara pehi mbo? Eye oSaulus. Zemburuka kutja eye wa ri ngwi ngwaa tjevere ozombanda zovarumendu mba zepa Stefanus nomawe. Tara kondjerera onene ndjo! Mape kayenda tjike?
Kombunda yonḓiro yaStefanus, Saulus wa ri omuhongore motjiungura tjokupaha ovahongewa vaJesus kutja me ve tatumise. Eye aa kayenda okuza kondjuwo nondjuwo ne ve kokozora okuvepitisa mozondjuwo, okuzambo e ve yumbu mondeko. Ovahongewa ovengi va taurira kovihuro vyarwe nave kauta okuzuvarisa “ombuze ombwa” ngo. Nungwari Saulus wa ya kovihuro vyarwe okukapaha ovakongorere vaJesus. Nu tja ri mondjira okuyenda koDamaskus ape tjitwa otjihimise hi:
Tjimanga ondjerera okuza keyuru ya kondoroka Saulus. Eye wa wira pehi, otja tji matu munu mba. Okuzambo a zuu eraka nda tja ku ye: ‘Saulus, Saulus! Mo ndji tjerere tjike okundjizepa?’ Ovarumendu mba ri puna Saulus va muna ondjerera nave zuu ombosiro yeraka, nungwari kaave zuu mbi mavi hungirwa.
Saulus wa pura na tja: ‘Oove aṋi, Muhona?’
Eraka re mu zira nari tja: ‘Owami Jesus ngu mo hihamisa.’ Jesus wa hungira omambo nga mena rokutja indu Saulus tji ma tatumisa ovahongewa ve, Jesus ee rimunu aayo eye omuini ngu ma tatumisiwa.
Saulus nambano wa pura na tja: ‘Hi tjite vi, Muhona?’
Jesus we mu zira na tja: ‘Sekama nu kahite moDamaskus. Ingo oku mo karaererwa kutja mo sokutjita tjike.’ Indu Saulus tja sekama na paturura omeho we, eye ke na tjaa munu. Eye wa twikire! Okutja ovarumendu mba ri puna ye arire tji ve mu kambura pokuoko nave mu hitisa moDamaskus.
Okutja Jesus wa hungira nomuhongewa we umwe moDamaskus, na tja: ‘Ananias, sekama. Twende komuvanda mbu ku za Omuvanda Omusembame. Pondjuwo yaJudas nga rire pu wa kapurira omurumendu wena Saulus. Ami mbe mu toorora okurira omukarere wandje wapeke.’
Ananias wa puratena ku Jesus. Indu eye tja hakaena na Saulus eye wa yambeka omake ku ye na tja: ‘Muhona we ndji tumu kove kutja u yenene okumuna rukwao nu u urisiwe nombepo ondjapuke.’ Nu tjimanga kwa tatuka ovikotji ohamukwao novyehundju komeho waSaulus, neye wa yaruka okumuna rukwao.
Saulus wa ungurisiwa momiano omihimise okuzuvarisa ombuze kovandu voviwaṋa ovingi. Eye wa rira omuapostele Paulus nu matu kerihonga ovingi ohunga na ye. Nungwari rutenga, indjeye tu tare kutja Mukuru wa hinda Petrus okukatjita tjike.
