WHỌ riẹ ohwo nọ ọrọ evaọ otọ na? Ọye họ Sọl. Kareghẹhọ, ọ ye họ ọnọ oriwi iwu ahwo nọ a rehọ itho fi Stivin. Rri elo ọnwranwra ọyena! Eme ọ rẹ via na?

Okenọ a kpe Stivin no, kọ Sọl họ ọnọ ọkaro evaọ ilele Jesu egwọlọ re a nwae oma. O je no uwou ruọ uwou ove siae fihọ otafe ove gbolae fihọ uwou-odi. Ilele na buobu etẹ dhẹ kpohọ ikpewho efa a tẹ jobei mu “emamọ usi” na họ ewhowho. Rekọ Sọl okpobọ ikpewho efa na nyae gwọlọ ilele Jesu. Enẹna obọ Damaskọs ọ rẹ nya na. Rekọ, evaọ edhere na, onana họ oware ugbunu nọ ovia:

Idudhe kpregede na elo o te lo no ehru ze wariẹ Sọl họ. Ote kie fihọ otọ, epanọ ma rẹ ruẹ etenẹ na. Koyehọ urru jọ ota nọ: ‘Sọl, Sọl! Ẹvẹ whọ jẹ be nwa omẹ oma?’ Ahwo nọ a jọ kugbe Sọl a ruẹ elo na a te je yo edo urru na, rekọ a sae riẹ otọ oware nọ a rẹ ta ha.

‘Whẹ ono, Olori?’ ere Sọl ọnọ.

‘Mẹ Jesu, ọnọ whọ rọ oma ẹnwa,’ ere urru na ota. Jesu ọ ta onana kemena Sọl ọ tẹ nwa ilele Jesu oma, Jesu ọ rehe riẹ wọhọ nọ ọye oma riẹ a be nwa oma na.

Sọl ọ tẹ nọ: ‘Ovẹ me re ruẹ, Olori?’

‘Kparoma who kpobọ Damaskọs,’ ere Jesu ọ ta. ‘A te jobe ta onọ who re ti ruẹ kẹ owhẹ.’ Okenọ Sọl ọkparoma rovie aro riẹ, ọ ruerẹ ivomo oware he. Otuaro no! Fikiere ahwo nọ ajọ kugbei a te krei obọ a je sue’i kpobọ Damaskọs.

Jesu ọ tẹ tẹme kẹ omọvo ilele riẹ jọ evaọ Damaskọs, nnọ: ‘Kparoma, Ananias. Kpobọ iyẹrẹ nọ a re se Oliọliọ. Jọ evaọ uwou Judas nọ ekpẹ ohwo nọ a re se Sọl. Mẹ hariẹ no re ọjọ odibo oghẹrẹsa kẹ omẹ.’

Ananias o te ru ere. Okenọ ọ ruẹ Sọl, ọ tẹ rehọ obọ riẹ kpahiẹe ọ tẹ ta nọ: ‘Ọnowo na ovi omẹ ze re whọ wariẹ ruẹ ude re ẹzi ọfuafo ọvọ owhẹ oma.’ Ẹsiẹvo na eware jọ nọ ewọhọ egbẹ iyei i te kie no Sọl aro ze, ọ tẹ wariẹ ruẹ ude.

A rehọ Sọl ruiruo evaọ edhere ologbo re ọvuẹ ẹme na kẹ ahwo erẹwho buobu. Ọye ozi kpohọ e Pọl ukọ na, ọnọ ma ti gbe wuhrẹ eware efa buobu kpahe. Rekọ ma kake ruẹ oware nọ Ọghẹnẹ o vi Pita nyai ru tao.