GA KAW e kadawng taw nga ai wa gaw kadai re ai hpe nanhte chye ma ni? Shawlu rai nga ai. Matsing ai kun? Stehpan hpe nlung hte kabai sat kau ai masha ni a hpun palawng hpe sin ya ai wa gaw shi nan rai nga ai. Htoi tu ai nhtoi yan kaba hpe yu dat u. Hpa byin nga ai kun?

Stehpan hpe sat kau ai hpang e, Shawlu woi awn nna Yesu a hpang hkan ai masha ni hpe tam la nna, zingri ma ai. Nta langai hte langai shang nna shanhte hpe ndaw de karawt shapraw la nhtawm htawng jahkrat ai. Sape ni law law kaga mare de hprawng sa wa ai. Shanhte du ai shara shagu hkan e “kabu kara shi ga” hpe hkaw tsun ma ai. Raitimung Shawlu gaw kaga mare de sa nna Yesu a hpang hkan ai masha ni hpe hkan tam ai. Ya Damasaku mare de sa wa nga ai. Raitimung lam lapran e, laklai lam langai mi hte hkrum kadup ai:

Nhtoi langai shi a makau grup yin e a kajawng sha htoi kabrim wa ai. Dai shaloi ndai sumla hta mu ai hte maren Shawlu ga de kadawng taw mat ai. Bai nna nsen langai mi pru wa ai: ‘Shawlu! Shawlu! Nang ngai hpe hpa rai zingri nga a ta?’ nga ai.Shawlu makau na masha ni gaw nhtoi kabrim wa ai hpe mu ai. Nsen na ma ai. Raitimung hpa hpe tsun nga ai lam nchye ma ai.

Shawlu gaw, ‘madu e nang kadai rai nga a ta?’ nga nna san ai.

‘Ngai gaw nang zingri ai Yesu rai nga nngai,’ nga nna nsen madu gaw htan ai. Yesu ning nga nna tsun ai lam gaw Shawlu Yesu a hpang hkan ai masha ni hpe zingri ai gaw shi hpe zingri ai zawn hkam sha ai majaw re.

‘Ngai hpa galaw na kun madu e,’ nga nna Shawlu san ai.

‘Rawt u. Damasaku mare de sa wa su. Nang hpa galaw na lam dai kaw du jang chye na re,’ nga nna Yesu tsun ai. Shawlu rawt nna myi hpaw yu yang hpa mung nmu lu sai. Shi myi kyaw mat sai. Shi hte lawm ai masha ni gaw, shi hpe lata dun nna Damasaku mare de woi shang wa ma ai.

Yesu gaw Damasaku na shi a sape langai mi hpe tsun ai. ‘Anani e, rawt u. Lamding ngu ai mare lam de sa u. Yuda a nta du jang Shawlu mying ai masha langai mi hpe hkan tam u. Dai wa hpe nye a lak san mayam langai tai na matu ngai lata la sai,’ nga nna tsun ai.

Anani gaw tsun ai hte maren madat ai. Shawlu hte hkrum ai shaloi shi a ntsa e lata mara ya nna: ‘Na a myi bai mu wa na hte Chyoi pra ai wenyi hte hpring hkra galaw na matu madu gaw ngai hpe shangun dat ai,’ nga nna tsun ai. Dai shaloi Shawlu a myi kaw na nga asep zawn san ai arai ni alawan sha gaw hkrat wa nna myi bai mu lu ai.

Masha amyu baw shagu hpe hkaw tsun ai hta Shawlu hpe tang du hkra asung jashawn ai. Shawlu gaw kasa Pawlu tai wa ai. Shi a lam hpe law law naw chye lu na re. Shawng nnan e, Karai Kasang gaw Petru hpe shangun dat nna, hpa galaw shangun ai hpe yu yu ga.