MBELA ou shi shii kutya olyelye oo a nangala pedu mefano olo la ama kolulyo? OSaulus. Dimbuluka kutya Saulus omulumenhu omunyasha winya a li a kelela oikutu yovalumenhu ava va dipaa Stefanus nomamanya. Tala kouyelele oo tau vilima! Oshike mbela sha li sha ningwa po?

Konima eshi Stefanus a dipawa, Saulus oye a li a ninga omukwatelikomesho waavo va li tava kongo ovashikuli vaJesus opo ve va hepeke. Okwa li te va kongo ta ende eumbo neumbo nokwa li e va kokolola mo momaumbo noku va tulifa modolongo. Ovahongwa vahapu ova li va ya onhapo koilando imwe nova ka hovela okuudifa ‘onghundana iwa’ koilando oyo. Ndele Saulus okwa li a landula ovashikuli vaJesus noku va konga mo moilando oyo. Ndele fimbo e li mondjila ta i kuDamaskus, opa li pa ningwa oshikumwifilonga tashi landula:

Saulus okwa li a minikilwa ombadilila kouyelele wa twa wa dja meulu. Saulus okwa li e lidenga poshi ngaashi tu shi wete mefano omo. Opo nee, okwa uda ewi tali ti: ‘Saulus, Saulus, omolwashike to hepeke nge?’ Ovalumenhu ovo va li naSaulus navo ova li va mona ouyelele nova uda ewi, ndele kava li va uda ko eshi sha tongwa.

Saulus okwa li a pula a ti: ‘Omwene, oove lyelye?’

Ewi ola nyamukula tali ti: ‘Aame Jesus ou to hepeke.’ Jesus okwa li a popya ngaho, molwaashi eshi Saulus a li ta hepeke ovashikuli vaJesus, paulelalela okwa li a fa ta hepeke Jesus ye mwene.

Saulus okwa li a pula vali ta ti: ‘Omwene ondi na okuninga po shike?’

Jesus okwa ti kuye: ‘Fikama uye kuDamaskus noto ka lombwelwa eshi u na okuninga shimha wa fiki.’ Eshi Saulus a fikama, ka li vali e wete ko, molwaashi okwa li a twika. Onghee hano, ovalumenhu ovo a li navo ove mu kwata meke, ndele tave mu twala kuDamaskus.

Opo nee, Jesus okwa ka lombwela omuhongwa waye umwe wokuDamaskus, a ti: ‘Ananias fikama, inda keumbo laJudas nondjila inya ya lukwa ondjila ya yuka. Ka konge omulumenhu wedina Saulus, molwaashi onde mu hoolola a ninge omupiya wange e likalekelwa.’

Ananias okwa li a ninga ngaashi a lombwelwa. Eshi a mona Saulus, okwe mu tenheka omake aye, ndele ta ti kuye: ‘Omwene okwa tuma nge opo ndi ku twikulule noto ka yadifwa omhepo iyapuki.’ Ohaluka, momesho aSaulus omwa li mwa wa oinima ya fa oipwakotola nokwa li a twikuluka.

Saulus okwa li a longifwa kuJesus monghedi ya tongomana a udifile ovanhu vomoiwana i lili noku lili. Saulus okwa ka shiivika nawa e li omuyapostoli Paulus nohatu ke lihonga shihapu shi na sha naye. Ndele tete natu ka taleni kutya Kalunga okwa li a tuma Petrus a ka ninge shike.