NANCHI wamuyuka awe walaala pa kikye kipikichala nyi? Jizhina janji Saulo. Vuluka kuba’mba ye yewa walamine bivwalo bya boba bantu bamwashile mabwe Setepena. Akimona kyeya byo kyasama! Nanchi ki ka kibena kubiwa?

Setepena byo bamwipayile, Saulo wayile na kukeba baana ba bwanga ba kwa Yesu kuba’mba ebamanyike. Wayilenga ku nzubo ne nzubo na kwibakulumunamo ne kwibataya mu kaleya. Baana ba bwanga bavula bapalañenejile mu mizhi ikwabo ne kutendeka kusapwila “mambo awama.” Pano Saulo wayile ku mizhi ikwabo na kukeba baana ba bwanga ba kwa Yesu. Onkao mambo, wajinga pa lwendo lwa kuya ku Damasakasa. Pano byo akiyilenga, kino kyo kintu kya kukumya kyaubiwe:

Ponkapo kyeya kya mwiulu kyamusamijile Saulo. Ne aye waponene panshi, byonka byo tubena kumona pa kikye kipikichala. Kepo jiwi jamwambijile’mba: “Saulo, Saulo, kyo wampachila i ki ka?” Aba bantu bajinga ne Saulo bamwene kyeya ne kumvwa jiwi, bino kechi baumvwine byaambiwenga ne.

Saulo waipwizhe’mba: ‘Lelo yenu bañanyi Nkambo?’

Jiwi jakumbwile’mba: ‘Amiwa ne Yesu ye wapata obewa.’ Yesu waambile bino mambo Saulo byo apachile baana ba bwanga ba kwa Yesu, aye Yesu waumvwine nobe ye bapata.

Saulo po po aipwizhe’mba: ‘Pano ngube byepi, Nkambo?’

Yesu wamwambijile’mba: ‘Imana, uye ku Damasakasa. Ko ko bakakubula bintu byonse byakutongwelwa kuba obewa.’ Saulo byo aimene, wakankelwe kumona nangwa kimo ne. Meso anji ajinga aputwa! Bantu bo ajinga nabo bamukwachile ku kuboko ne kumutwala ku Damasakasa.

Yesu wabwelele waambila mwananji wa bwanga umo mu Damasakasa amba: ‘Imana Ananyasa, uyenga mu mukwakwa ye batela’mba, waoloka, ukepuzhe ku nzubo ya Yudasa muntu jizhina janji Saulo. Aye ye ye nasalulula ke wami wa mwingilo.’

Ananyasa wakokejile. Byo amonañene ne Saulo, wabikile maboko anji pe aye ne kwamba’mba: ‘Nkambo ye wantuma amba, mumone meso, ne kuyula na mupashi wazhila.’ Kabiji ponkapotu pa meso anji Saulo paponene bintu biji nobe mabamba, kamone ne kumona.

Saulo bamwingijishe kyabaya bingi kusapwila ku mikoka ya bantu yavula. Waishile kutelwa’mba mutumwa Paulo, yenka ye tukafundapo bingi. Bino patanshi, twaya tumone Lesa byo atumine Petelo amba obe.