ပူ ၁၀၈
ဖဲကျဲၤလၢအလဲၤဆူ ဝ့ၢ်ဒၤမ့ၤစ့း
ပှၤလၢအလီၤဃံၤလၢဟီၣ်ခိၣ်လိၤန့ၣ် မ့ၢ်မတၤလဲၣ် သုသ့ၣ်ညါဧါ. မ့ၢ်ဝဲစီလူးသၢၣ်. သုသ့ၣ်နီၣ်အီၤဧါ. အဝဲဒၣ်ဘၣ်ခိးန့ၢ် ပှၤတဖၣ်လၢအကွံာ်သံစတ့ဖၣ် အတၢ်ကူတၢ်ကၤတဖၣ်န့ၣ်လီၤ. ကွၢ်တၢ်ကပီၤကပြုၢ်ကပြီၤအထူၣ်ဖးဒိၣ်န့ၣ်တဘီ. ဘၣ်မနုၤန့ၣ်လဲၣ်.
ဖဲတၢ်မၤသံစတ့ဖၣ်ဝံၤအလီၢ်ခံ, စီလူးကဲခိၣ်ကဲနၢ်လၢ တၢ်လူၤဖီၣ်ပှၤပိာ်ခရံာ်အခံတဖၣ် လၢကမၤနးမၤဖှီၣ်ဝဲအဂီၢ်န့ၣ်လီၤ. လဲၤဝဲတဟံၣ်ဘၣ်တဟံၣ်ဝံၤ ထုးထီၣ်အဝဲသ့ၣ်ဆူခိ ဒီးတ့ၢ်လီၤအီၤဆူဃိာ်ပူၤလီၤ. ခရံာ်အပျဲၢ်အဘီၣ်အါဒ်အါဂၤ ဃ့ၢ်ဆူခူဝ့ၢ်, ဒူသဝီတဖၣ်ဒီး ဖဲအတုၤတၢ်လီၢ်တတီၤဂ့ၤ, တတီၤဂ့ၤန့ၣ် စံၣ်တဲၤတဲလီၤဝဲသ့ၣ် “တၢ်သးခုကစီၣ်” န့ၣ်လီၤ. ဘၣ်ဆၣ်သနာ်က့ စီလူးစ့ၢ်ကီး လဲၤဆူဝ့ၢ်အဂၤတဖၣ်ဒီး ဟးဃုဝဲ ပှၤပိာ်ယ့ၣ်ၡူးအခံတဖၣ်န့ၣ်လီၤ. ခဲအံၤ လဲၤဝဲဒၣ်ဆူ ဝ့ၢ်ဒၤမ့ၤစ့းန့ၣ်လီၤ. ဘၣ်ဆၣ် ဖဲကျဲဖးဖီန့ၣ် ဘၣ်သဂၢၢ်ဝဲဒၣ်ဒီး တၢ်မၤအသးလီၤလးတခါန့ၣ်လီၤ.
တၢ်ကပီၤဟဲလီၤလၢမူခိၣ်တခါ ဝးတရံးစီလူး သတူၢ်ကလာ်န့ၣ်လီၤ. ဒီး ဒ်ပထံၣ်ဘၣ်လၢတၢ်ဂီၤပူၤအသိး စီလူးလီၤဃံၤဆူဟီၣ်ခိၣ်လိၤန့ၣ်လီၤ. ဝံၤဒီး, တၢ်ကလုၢ်သီၣ်ထီၣ်တခါ လၢအသံကွၢ်ဝဲဒၣ် ‘စီလူးဧၢ, စီလူးဧၢ, ဘၣ်မနုၤအဃိ နမၤအၢမၤနးယၤလဲၣ်.’ ပှၤအိၣ်လၢစီလူးအကပၤတဖၣ်တခီ ထံၣ်ဝဲသ့ၣ်တၢ်ကပီၤဒီး နၢ်ဟူဝဲသ့ၣ်တၢ်ကလုၢ်စ့ၢ်ကီး ဘၣ်ဆၣ်, တနၢ်ပၢၢ်ဝဲသ့ၣ်ဘၣ်.
စီလူးသံကွၢ်ကဒါက့ၤလၢ ‘ကစၢ်ဧၢ, နမ့ၢ်မတၤလဲၣ်’ န့ၣ်လီၤ.
တၢ်ကလုၢ်အကစၢ် စံးဆၢက့ၤအီၤလၢ ‘ယမ့ၢ်ယ့ၣ်ၡူးလၢနမၤအၢအီၤလီၤ.’ ယ့ၣ်ၡူးတဲဝဲဒ်အံၤန့ၣ် မ့ၢ်လၢ စီလူးမၤနးမၤဖှီၣ် ပှၤပိာ်ယ့ၣ်ၡူးအခံတဖၣ်အဃိ, ဒီးမၤအသးဒ် အမၤနးမၤဖှီၣ်ဝဲ ယ့ၣ်ၡူးအသိးအဃိန့ၣ်လီၤသၢၣ်.
စီလူးသံကွၢ်ကဒါက့ၤဝဲဒၣ် ‘ကစၢ်ဧၢ, ယကဘၣ်မၤဒ်လဲၣ်.’
ယ့ၣ်ၡူးစံးဆၢက့ၤအီၤ ‘ဂဲၤဆၢထၢၣ်ဒီးလဲၤဆူဝ့ၢ်ဒၤမ့ၤစ့းတက့ၢ်. နကဘၣ်မၤမနုၤလဲၣ်န့ၣ် နမ့ၢ်တုၤဒီး နကသ့ၣ်ညါလီၤ.’ ဖဲစီလူးဂဲၤဆၢထၢၣ်ဝဲဒီး အိးထီၣ်အမဲာ်အခါ တထံၣ်ဝဲတၢ်နီတမံၤလၢၤဘၣ်. အမဲာ်ဘျီၣ်ဝဲလံလီၤ. ဒ်န့ၣ်အဃိ ပှၤလၢအကပၤတဖၣ် ဖီၣ်အစုဒီး ဆှၢအီၤဆူဝ့ၢ်ဒၤမ့ၤစ့းန့ၣ်လီၤ.
ဖဲန့ၣ်အကတီၢ်န့ၣ် ယ့ၣ်ၡူးတဲဘၣ်အပျဲၢ်တဂၤလၢ အအိၣ်လၢ ဝ့ၢ်ဒၤမ့ၤစ့းဒ်အံၤလီၤ. ‘အနၤနံဧၢ, ဂဲၤဆၢထၢၣ်ဒီးလဲၤဆူကျဲလၢ တၢ်ကိးအမံၤလၢကျဲဘျၢ, ဒီးနမ့ၢ်တုၤလၢ ယူဒၤအဟံၣ်န့ၣ် ဃုပှၤလၢ တၢ်ကိးအီၤလၢစီလူးန့ၣ်တက့ၢ်. ယဃုထၢထီၣ်အီၤ ဒ်ယကုၢ်ယပှၤလၢအလီၤဆီတဂၤလံ န့ၣ်လီၤ.’
အနၤနံမၤဝဲဒ် ဘၣ်တၢ်မၤလိာ်အီၤအသိးန့ၣ်လီၤ. ဖဲအထံၣ်စီလူးအခါ ပာ်လီၤအစုလၢအဖီခိၣ် ဒီးစံးဘၣ်အီၤလၢ ‘ဒ်သိးနမဲာ်ကထံၣ်ထီၣ်က့ၤတၢ်အဂီၢ်ဒီး နကပှဲၤထီၣ်ဒီးသးစီဆှံအဂီၢ် ကစၢ်မၢလီၤယၤလီၤ.’ ထဲန့ၣ်တဘျီဃီ, တၢ်လၢအဒ်သိးဒီးညၣ်အသဒံၣ်န့ၣ် လီၤတအီးလၢ စီလူးအမဲာ်ချံးဒီး ထံၣ်ထီၣ်က့ၤဝဲဒၣ်တၢ်လီၤ.
စီလူးန့ၣ် ဘၣ်တၢ်သူအီၤဒိၣ်ဒိၣ်မုၢ်မုၢ်လၢ အကစံၣ်တဲၤတဲလီၤပှၤကိးကလုာ်ကိးမၠိဒဲး န့ၣ်လီၤ. အဝဲဟဲကဲထီၣ် တၢ်မၢဖိပီလူးန့ၣ်လီၤ. ပကသ့ၣ်ညါဘၣ်အဂ့ၢ် အါမးဒံးန့ၣ်လီၤ. ဘၣ်ဆၣ်, အဆိန့ၣ် မ်ပကွၢ်သကိး ယွၤမၢလီၤပ့းတရူးလၢ အကမၤဝဲမနုၤလဲၣ်န့ၣ်တက့ၢ်.
