Esimwititi 108: Monzira zokoDamasikusi
ONO diva asi yilye ogo ana rara pevhu? Age yige Sauru. Diworoka, age yige ga kungire yikoverero yovagara vena va dipagere Sitefanesa nomamanya. Tara uzera owo wokupaima! Yinke yina kuhoroka?
Konyima zokudipaga Sitefanesa, Sauru ta pitisire mokusana vasikuli vaJesus a va rwadeke. Ta zi tunda embo zende embo nokuvakoka mo a ka va ture modorongo. Varongwa wovanzi tava dukire koyitata nayopeke nokukazuvhisira ko nako “mbudi zongwa.” Nye Sauru ta zi koyitata nayopeke a ka papare vasikuli vaJesus. Ngesi age kuna kara monzira zokuza koDamasikusi. Nye monzira, tamu horoka sininke sositetu:
Haruka ko, uzera wokutunda meguru tau tema u kundurukide Sauru. Ta ligandere pevhu ngomu tuna kumumona apa. Makura ezwi tali tanta asi: ‘Sauru, Sauru! Yinke ono kuhepekera nge?’ Vagara ava vana kara naSauru tava mono uzera nokuzuvha muhagaro gezwi, nye kapi vana kuzuvha asi yinke lina kutanta.
Sauru ta pura asi: ‘Nyove yilye, Hompa?’
Ezwi tali limburura asi: ‘Nyame Jesus ogu ono kuhepeka.’ Jesus kuna kuyiuyungira eyi morwa apa Sauru ana kuhepeka vasikuli vaJesus, Jesus kuna kulizuvha ngwendi yige vana kuhepeka mwene.
Sauru ta pura asi: ‘Yinke nani rugana, Hompa?’
Jesus ta tanta asi: ‘Katuka o ze koDamasikusi. Okwina yiko nava ka ku tantera eyi no rugana.’ Sauru eyi ana kukatuka a pahure meho gendi, neisi ana kumona. Ana twika! Makura vagara ava vana kara nage tava mu kwata kokuwoko nokumutwara moDamasikusi.
Jesus makura ta uyunga nomurongwa gwendi gumwe moDamasikusi nokumutantera asi: ‘Ananiyasa, katuka. Zende konzira ezi ava tumbura asi Nzira zoKuvyuka. Ka pulide membo lyaJudasa mugara gedina Sauru. Ame kuna mu horowora a kare mukareli gwange gokulikerera.’
Ananiyasa ta limburukwa. Apa ana ka gwana Sauru, ta mu kambeke mawoko gendi nokutanta asi: ‘Hompa kuna tumu nge asi o mone hena ntani o zure mpepo zokupongoka.’ Poopo momeho gaSauru tamu gu yininke yokufana ngwendi nongande, makura ta tameke hena kumona.
Sauru kuna mu ruganesa monkedi zonene a zuvhisire vantu wonomuhoko dononzi. Age kwa ya divikwire asi mupositoli Paurusa, ogu natu ka lironga yoyinzi. Nye pomuhowo, tu tareni asi yinke ana kutuma Karunga Peturusa a ka rugane.
Yirugana 8:1-4; 9:1-20; 22:6-16; 26:8-20.
Mapuro
- Yinke ana rugana Sauru konyima vana dipaga Sitefanesa?
- Sininke musinke sositetu sina horoka apa ana kara Sauru monzira zokuza koDamasikusi?
- Yinke ana tantere Jesus Sauru a rugane?
- Mapukururo musinke ana kugava Jesus kwaAnaniyasa, ntani yisinke yina horoka yipo Sauru a mone hena?
- Edina musinke ga ya divikwire nalyo Sauru, ntani ngapi omu va mu ruganesere?
Mapuro gokugwederera ko
- Resa Yirugana 8:1-4.
Elihaneno lyomahepeko eli lya kundamene nombungakriste donompe, ngapi omu lya vaterere mokuhanesa epuro lyoSikriste, ntani yininke musinke yokulifana ya horoka moyiruwo yantani?
- Resa Yirugana 9:1-20.
Yirugana yitatu musinke eyi ga geve Jesus kwaSauru?
- Resa Yirugana 22:6-16.
Ngapi omu natu vhura kukara ngwendi Ananiyasa, ntani morwasinke ya karera mulyo?
- Resa Yirugana 26:8-20.
Epiruko lyaSauru koUkriste, ngapi omu lya kara ngekorangedo kowo va kara naina novakwali wovahapuli?
