NGA ozeye nani ndioyo olele vana ntoto? I Saulu. Sungamena vo o Saulu i muntu wasimbang’e mvwatu mia wantu batubanga Setefano o matadi. Tala ntemo wau. Adieyi dibwanga vava?

Vava Setefano kafwa, Saulu okedi se ntu muna bangika alandi a Yesu. Wakotanga nzo ke nzo, mu kanga alongoki yo kubasia muna pelezo. Alongoki ayingi batinina muna mavata makaka yo ‘telekela nsangu zambote.’ Kansi, o Saulu wayendanga muna mavata makaka mu kanga alongoki a Yesu. Owau, wele kuna Dameseke. Kansi, tala diambu diesivi diambwila muna nzila:

Kuna kinsalukisa ntemo utukidi kun’ezulu utemene vana kena. Obwidi vana ntoto nze una tumwene vava. Owidi ndinga imvovese vo: ‘E Saulu, e Saulu, ekuma okumbangikilanga?’ O wantu ana bakangala yandi, bamwene o ntemo yo wa ezu dia ndinga, kansi ke babakwidi dina diavovwa ko.

O Saulu ovutwidi vo: “Ongeye u nani, e Mfumu?”

E ndinga imvutwidi vo: “Mono i Yesu, on’obangikanga.” Yesu wavova ediadi kadi, vava Saulu kabangikanga alandi a Yesu, dina nze Yesu kabangikanga.

O Saulu oyuvwidi vo: ‘Adieyi mfwete vanga e Mfumu?’

Yesu umvutwidi vo: ‘Telama, wenda kuna Dameseke, kuna osamunwinwa din’ofwete vanga.’ Vava Saulu katelama yo ziula meso, yandi kamoni ma. Meso mandi mafwidi. Wantu kakala yau bansimbidi muna koko, bamfididi kuna Dameseke.

O Yesu ovovese kwa nlongoki andi kuna Dameseke oku vo: ‘Anania, telama, wenda muna nzila iyikilwanga vo Nsingingi, nd’amvavi muna nzo a Yuda, o muntu, nkumbu andi Saulu. Insolele se selo kiamfunu oku ngina.’

Anania wele. Vava kamwene Saulu unyambikidi o moko, oku vo: ‘O Mfumu untumini kwa ngeye, wamona diaka yo zala yo mwand’avelela.’ Vana vau muna meso mandi mubwidi má nze mavavala, omwene diaka.

O Saulu wasadilwa mu samuna nsangu zambote kwa zula yayingi. Wazayakana se ntumwa Paulu. Tulongoka mayingi mu kuma kiandi. Kansi, yambula twabadika ntete dina Nzambi katuma Petelo mu vanga.