Icisimicisyo 108: Pa Musebo wa ku Damasiko
KANI wamwisiba uyo ulele pansi? Ni Saulu. Anuka ukweba’ti ye e walukulama amakoti ya balalume abatobele Stefano amabwe. Lolesya ukutuba kulya ukukulu! Mba nindo ilukucitika?
Panuma ili Stefano bamwipaya, Saulu atangilila mu kufwayafwaya abasambile ba baYesu ati abasomesye. Aingila mu maŋanda onse ne kubakulumunamo ne kubaposa mwi kati. Abengi abasambile bapalanganina mu misi imbi ne kutatiko’kutulisya ‘icebo iciweme’ kulya. Pano Saulu aya mu misi imbi mu kufwaya abasambile ba baYesu. Lomba pano ali pa lwendo lwakwe ulwa kuya ku Damasiko. Pano, pa nsila, ici cintu cakukankamika cacitika:
Kwapulilila ukubyato’kutuba ukwa kufuma kwiulu ukumusinguluka Saulu. Awa pansi, koti nifyefyo wabona apa. Eli isiwi lyalabila ati: ‘Saulu, Saulu! Mba nindo iyi ulukunsomesesya?’ Abalalume abali na Saulu bakubono’kutuba kabili balyumfwe’siwi, pano tekuti bomfwisye ifilukulabilwa.
Saulu aipusya ati: ‘Mba nimwe bani, mwe baSikulu?’
Isiwi lyalabila ati: ‘Nine baYesu, abo abaulukusomesya.’ BaYesu balabile’fi nipakuti ili Saulu alukusomesya abasambile ba baYesu, baYesu balomfwa koti nibo balukusomesya.
Saulu pano aipusya ati: ‘Mba nifindo nakucita, mwe baSikulu?’
BaYesu balabila ati: ‘Ima kabili uye ku Damasiko. Uko lomba fikalabilwa kuli webo ifyelelwe webo ukucita.’ Ili Saulu apapuka ne kwisula amenso akwe, tekuti abonepo neli kantu. Apofula! Popele abalalume abali naye bamwikata pa kuboko ne kumutangilila ku Damasiko.
Pano baYesu balabila kuli umo uwa basambile babo mu Damasiko, ati: ‘Ima, Ananaya. Koya ku musebo uwilicilwe ati Uwololokele. Ukepusye mu ŋanda yakwe Juda umwalalume isina lyakwe ni Saulu. Namusalulula ukuba umupyungisi wanji uulibelele.’
Ananaya aumfwila. Ili amusangana Saulu, abika amaboko akwe pali ye ne kulabila ati: ‘BaSikulu bantuma nebo ati webo ungabona nakabili ne kwisulamo umupasi uswetelele.’ Impindi iyo yopele ifintu fimo ifilukuboneka koti mamba fyapona ukufuma mu menso akwe Saulu, kabili atatika ne kubona nakabili.
Saulu bamupyungisya mu nsila yamakosa ukutulisya ku bantu abamikoka iingi. Aisibikwa ati intangisi Paulu, woyo twakusambililapo ifingi. Pano ica kutanga, leka tubone ifi baLesa batuma Petilo mu kucita.
Ifyacitilwe 8:1-4; 9:1-20; 22:6-16; 26:8-20.
Ifyakwipusya
- Mba nifindo Saulu acita panuma ili Stefano bamwipaya?
- Ili Saulu ali pa lwendo lwakwe ulwakuya ku Damasiko, kani nicisa cintu ica kukankamika icacitika?
- Mba nifindo baYesu babula Saulu ukucita?
- Kani nifindo baYesu bafunda Ananaya ukucita, kabili findo fyacitika pakweba’ti Saulu atatike ukubona nakabili?
- Kani nikuli lisa isina Saulu aisibikilwa, kabili bamupyungisya muli isa’nsila?
Ifyakwipusya na fimbi
- Pendeni Ifyacitilwe 8:1-4.
Kani ukukululusya ukwacitikile pe kelesya lya bukumo ilya buKlistu kwalyofwele syani ukutandanya icicetekelo ca buKlistu, kabili nicisa cintu icipalileko icicitikile muli sino insiku? (Cit. 8:4; Yisa. 54:17)
- Pendeni Ifyacitilwe 9:1-20.
Kani nifisa fintu fitatu baYesu bafisulwile ifi balukufwaya Saulu ukupyunga? (Cit. 9:15; 13:5; 26:1; 27:24; Loma. 11:13)
- Pendeni Ifyacitilwe 22:6-16.
Kani fwebo tungaba syani koti ni Ananaya, kabili nindo ico cicindamine? (Cit. 22:12; 1 Tim. 3:7; 1 Pet. 1:14-16; 2:12)
- Pendeni Ifyacitilwe 26:8-20.
Kani filya Saulu aalulukile ukuba umuKlistu cingaba syani icakukoselesya kuli babo abopile neli abopilwe kuutacetekelepo? (Cit. 26:11; 1 Tim. 1:14-16; 2 Tim. 4:2; 1 Pet. 3:1-3)
