Chihande 108

Hajila Yakuya kuNdamashiku

UNAMWIJIVA ou mutu nasavala hamavu nyi? Ikiye Saulu. Nawanuka, ikiye uze alamine mahina avatu vaze vashile Setefwano malolwa. Tala ocho kumunyika kana! Chuma muka chinakulingiwa?

Omu vanamujihi Setefwano, Saulu hikutwaminyina milimo yakuya nakutondatonda vaka-kumukavangiza Yesu nakuvayanjisa. Hikuya nakwingila muzuvo hizuvo nakuvalovojola nakuvakasa mukamenga. Tumbaji vavavulu hikuchinyina kumembo eka nakuputuka kwambulwilako “mujimbu wamwaza.” Saulu hikuya nakumembo kana aze nakuvatuluka vaka-kumukavangiza Yesu. Ali jino haungeji wakuya kuNdamashiku. Oloze, hajila, chino chuma chakukomwesa hinachisoloka:

Kukasumuka kumunyika chakufuma mwilu zwalala hali Saulu. Nayikiye mbwa hamavu, nge muze tunamono hano. Kaha lizu ngwalyo: ‘Ove Saulu, ove Saulu! Unakunguyanjishila ika?’ Malunga vanakutambuka naSaulu kumunyika vanachimono nalizu nawa lyolyo, oloze kwivwa vyuma vanakuvuluka chiku.

Saulu ngwenyi: Ove Mwata, yoveyaze?’

Lizu ngwalyo: ‘Ami yami Yesu, uze unakuyanjisa.’ Yesu nahanjika ngocho mwomwo Saulu hakuyanjisa vaka-kumukavangiza, anakwivwa nge vanakumuyanjisa ikiye.

Saulu himwahula jino ngwenyi: ‘Ove Mwata, nangulika ngachilihi?’

Yesu ngwenyi: ‘Katuka, ingila muNdamashiku. Kaha navakulwezomwo mwatela ove kulinga.’ Saulu hakukatuka, meso wi. Hiupuputa! Jino hikumukwata kulivoko kuli malunga vali nenyi nakumutwala kuNdamashiku.

Yesu mwalweza kambaji kenyi umwe atwama muNdamashiku, ngwenyi: ‘Ove Ananyiya katuka. Yako kujila vavuluka ngwavo, Wakwoloka. Kaha wihule kuzuvo yaYuta mutu walijina lyaSaulu. Ngunamusakula apwenga ngamba yami wakulipwila.’

Ananyiya mwetavila. Hakumuwana Saulu, hikumunangika mavoko nakwamba ngwenyi: ‘Mwata nangutumu mangana utone kumeso ove, uzale nashipilitu wajila.’ Hoho vene hameso aSaulu hinahaholoka vyuma vyakufwana mavanda, nakutona cheka.

Saulu navamuzachisa mwamunene mangana ambulule kuvatu vaka-mafuchi eka amavulu. Himweza nakupwa jino ikiye kaposetolo Paulu, uze natulinangula chikuma. Oloze chatete, tutalenu ovyo Kalunga natumina Petulu.

Vilinga 8:1-4; 9:1-20; 22:6-16; 26:8-20.