MPANJI 108

Hanjila Yakuya kuDamakasa

WUNAMWILUKI iwu wunakami hamaseki? Diyi Sawulu. Anukaku diyi muntu wahembeli yikovwelu yawamayala amwasili Setefwanu malola. Talaña china chejeji chinatoñeki! Chumanyi chinakuzatika?

Hanyima yakumujaha Setefwanu, Sawulu hakutwaminina nakukeñakeña atumbanji twaYesu nakuyikabisha. Wayaña hetala nihetala nakuyikwata nakuyumbila mukaleya. Atumbanji amavulu hiyakutemukila kunyisumba yacheñi nakutachika kushimwina “nsañu yayiwahi” kwenakuna. Ilaña Sawulu wayaña nikunyisumba yacheñi nakukeñakeña atumbanji twaYesu. Ichi dinu wudi halwendu lwakuya kuDamakasa. Chadiñayi hanjila, ichi dichuma chakuhayamisha chinamwekani:

Kukasumuka chejeji chakufuma mwiwulu hichikumutoñekela Sawulu kwi-ndo. Hakudimbuka hamaseki neyi chitunakumona hanu. Dichi izu hidikumwila nawu: ‘Sawulu, Sawulu! Muloñadi chiwunakunkabishila?’ Amayala adi naSawulu anakumonaku hohu chejeji nikutiya kwezu, ilaña kwiluka chinakuhoshewa nehi.

Sawulu hakwihula nindi, ‘Yeyinyi Mwanta?’

Izu hidikuhosha nawu, ‘Yami Yesu yiwakabishaña.’ Yesu nahoshi mwenimu muloña Sawulu chakabishañayi atumbanji Twindi, Yesu watiyaña neyi yena diyi anakukabishawu.

Sawulu hakwihula nindi: ‘Nukwila ñahi Mwanta?’

Yesu hakuhosha nindi, ‘Nyamukaku wuyi kuDamakasa. Kuna akakuleja chiwatela kwila.’ Chineli Sawulu nanyamuki dehi nindi yatoni, kutwesha kumona chuma nehi. Napuuti dehi! Dichi amayala adiyi nindi hiyakumukwata kuchikasa nakumutwala kuDamakasa.

Yesu hakuhosha nakambanji kindi wumu wamuDamakasa nindi: ‘Ananiya, nyamukaku. Yaku mumukwakwa wukweti ijina daWoloka. Kwitala daYuda wihuli iyala wejina daSawulu. Namutondi kwikala kambuñami walema.’

Ananiya hakwovwahila. Chinamuwaniyi Sawulu hakumunañika makasa nakuhosha nindi: ‘Mwanta nantemeshi nindi wumoni cheñi nawa winzali spiritu yajila.’ Hohenohu yuma yidi neyi makalu hiyikuholoka mumesu aSawulu, hakutwesha nikumona cheñi.

Sawulu amuzatishili nankashi hakushimwina kudi antu akumatuña amavulu. Hakwikala kapostolu wejina daPawulu, owu yitukudizahu yuma yayivulu hadi yena. Ilaña tusambilenu kumona chuma chinamutumiwu Petulu kudi Nzambi nindi yakoñi.

Yililu 8:1-4; 9:1-20; 22:6-16; 26:8-20.