LEIA mu saw tunge ni i hria em? Saula a ni. Stephena lunga dengtute kawr ken saktu kha a ni tih hrereng la. Saw eng eng tak saw en teh! Enge lo thleng le?

Stephena tihhlum a nih hnuah, Isua zuitute tina tura zawnnaah Saulan hma a hruai a. In tinah a lut a, a hnuk chhuak a, tan inah a khung a. Zirtir tam takte chu khawpui dangah an tlan a, chutah chuan “chanchin tha“ an puang zel a. Mahse Isua zuitute hmu chhuak turin Saula chu khawpui dangah a kal a.Tunah Damaska khaw kawngah a kal a. Mahse kawnga thil mak tak lo awm chu hei hi a ni.

Thawkkhatah van atanga engin Saula velin a chhun a. Heta kan hmuh ang hian leiah a tlu a. Tin awin: ‘Saula, Saula! Engvanginnge mi tihnat? a ti a. Saula hnena mite chuan eng chu an hmu a, aw ri chu an hria a, mahse a sawi chu an hrethiam thei lo va.

‘Tunge i nih, Lalpa? Saulan a zawt a. ‘I tihnat Isua ka ni,’ aw chuan a ti a. Saulan Isua zuitute a tihnatin, Isuan amah tihnat ni anga a ngaih avangin lsuan chu chu a sawi a ni.

Saula chuan: ‘Enge ka tih ang, Lalpa,’ tiin a zawt a.

‘Tho la Damaska-ah kal rawh. Chutah chuan i tih tur chu hrilh i ni ang,’ Isuan a ti a. Saula a thawha a han men chuan engmah a hmu thei ta lo va. Mitdel a ni ta! Chuvangin a hnena mite chuan a kutah an chelh a, Damaska-ah an hruai ta a.

Isuan Damaska-a a zirtir pakhat hnenah a sawi a. ‘Tho rawh, Anani. Kawtthler Ngil an tihah kal la, Juda inah mi pakhat a hming Saula va zawt chhuak rawh. Ka chhiahhlawh pawimawh bik ni turin ka thlang tawh e,’ a ti a.

Ananian thu a awih a. Saula a hmuh chuan, a chungah kut a nghat a; ‘Khua i hmuh leh theihna tur leh thlarau thianghlima i khah nan Lalpan mi tir a ni,’ a ti a. Saula mit atang chuan phuhlip ang engemaw a tla nghal a, khua a hmu leh thei ta a.

Saula chu hnam tam taka mite hnena thu hriltu ropui ni tura hman a ni. Tirhkoh Paula tia hriat a rawn niin, a chanchin tam tak kan la hriat belh tura chu a ni. Mahse a hmasain, eng ti turin nge Pathianin Petera a tirh i en ang u.