¿NEL tnikʼa alkye xjal tkubʼ twitz txʼotxʼ? A Saulo. A ok xqʼuqinte kyxbʼalin qeju ok kyxoʼn abʼj tiʼj Esteban. ¡Kiʼnke aju spikʼen ma tzaj qoptzʼaj! ¿Tiʼ nbʼaj tzalu?

Tej otaq kyim Esteban, ok ten Saulo jyol kye t-xnaqʼtzbʼen Jesús naq tuʼn tok tbʼinchen mya bʼaʼn kyiʼj. E okx tjyoʼn kyoj ja ex i etz tiʼn ex i okx tqʼoʼn pres. Nim qe t-xnaqʼtzbʼen Jesús i eʼx toj junjuntl tnam ex e pakbʼan tiʼj ‹tbʼanel tqanil› kyoj tnam lu. Atzunte Saulo xi jyol qejo t-xnaqʼtzbʼen Jesús toj txqantl tnam. Xiʼtzun tuj tnam Damasco. Tej nbʼetteq tuʼn tpon toj Damasco ikʼ jun tiʼ aju nimxix t-xilen:

Naq minabʼen kubʼ qoptzʼaj jun spikʼun tiʼjele ajo tzajnitaq tuj kyaʼj, kubʼtzun tzʼaq twitz txʼotxʼ ex o tbʼi jun tqʼajqʼajel wibaʼj aju in tmaʼn: ‹¡Saulo, Saulo! ¿Tiquʼn nok tbʼinchaʼna mya bʼaʼn wiʼje?› Aqetzen xjal atqeʼtoq tukʼe Saulo kyil aju tqoptzʼajil spikʼen ex kybʼi tqʼajqʼajel wibʼaj, naqtzen tuʼnj mitiʼ el kynikʼ tiʼj.

Xitzun tqanin Saulo te: ‹¿Alkyetzuna?›

‹Aqine Jesús aju nok tbʼincheye mya bʼaʼn tiʼj›, chi tqʼajqʼojel wibʼaj. Tzaj tqʼamaʼn Jesús jlu quʼn tej tok tbʼinchaʼn Saulo mya bʼaʼn kyiʼj t-xnaqʼtzbʼen, tnaʼ Jesús qa tiʼj noktaq bʼinchaʼn jlu.

Xitzun tqanintl Saulo te: ‹Tat, ¿tiʼ tajbʼila tuʼn tbʼant wuʼne?›

‹Weʼktza ex txiʼya toj tnam Damasco›, chi Jesús te. ‹Ex kytzajel qʼamaʼn teya alkye tuʼn tbʼant tuʼna›. Tej tjaw weʼ Saulo ex tej tjaw tjaqoʼn twitz, mitiʼtl bʼant tkaʼyin. ¡Otaq kyaj moẍix! Tuʼntzunju, aqeju xjal ateʼtaq tukʼil xi kyjukʼuʼn, mo xi kyxkoʼn, tqʼabʼ tuʼn tpon tuj Damasco.

Tzajtzun yolin Jesús te jun t-xnaqʼtzbʼen toj Damasco ex tzaj tqʼamaʼn jlu te: ‹Weʼktza, Ananías, ex txiʼya jyol te jun xjal aju Saulo tbʼi toj tja Judas aju tkubʼ toj bʼe Jiqin (Tzinun) tbʼi. Ma jaw njyoʼne tuʼn tok te jun tbʼanelxix nmajene›.

Xiʼtzun Ananías. Tej tpon tukʼe Saulo, e kubʼ tqʼoʼn qe tqʼobʼ tibʼaj ex tqʼama: ‹Ma chin tzaj samaʼne tuʼn tjaqet twitza ex tuʼn tnoj tuj tanmiya tuʼn xewbʼaj xjan›. Etztzun tzʼaq jun tiʼ toj twitz Saulo ik tzeʼnj muʼp, ex e jaqet juntl maj twitz.

Nim ajbʼen Saulo tuʼn t-xi tiʼn tbʼanel tqanil kye xjal toj nimku tnam. Ax ikx ok tbʼi te apóstol Pablo, ok kʼelel mas qnikʼ tiʼj. Pero qo xnaqʼtzal tnejil tiʼ bʼent tuʼn Pedro.