¿MNIJÄˈÄP pën jam të kyëday naxkëjxy? Yëˈë Saulʉ. Ja diˈib ojts tkuentˈäjtë wyit pënaty kyukäˈtstë Esteebʉ. ¡Ixë tadë jäjënë diˈib tëˈxˈawdijtp! ¿Ti jam tuun jäjtëp?

Ko Esteebʉ ojts yˈoˈknë ta Saulʉ tpatsoˈonyë Jesusë yˈëxpëjkpëty ets tˈaxëktuuny. Nyidëjkë jyënoty tyëgoty ets tpëjtaktë pujxndëgoty. May ja ëxpëjkpëty kyaktë ets ojts nyëjxtë wiink nax wiink käjpn ets jam ojts tkäjxwäˈxtë ja “oybyë ää ayuk”. Perë Saulʉ ta ojts tninejxy wiink käjpn ja Jesusë yˈëxpëjkpëty. Min nˈokˈijxëm ti tuˈääjy jäjt këbajtë ko nety nyejxy Damaskʉ.

Ajotkumonë tuˈugë jäjënë tsyoˈony tsäjpotm ets tnijäjˈawdijtyë Saulʉ. Ta kyëdääjy extëm yam xyˈixy. Ta tuˈugë ayuk yˈanmääyë: ¡Saulʉ, Saulʉ! ¿Tikots axëëk xytyuny? Ja yetyëjkëty diˈibë nety mëdë Saulʉ yˈijxtë ja jäjënë ets myëdoodë ja ayuk, per kyaj tjaygyujkëdë wiˈix jyënaˈany.

Saulʉ ta dyajtëëjy: ¿Mbën mijts wintsën?

Ta yaˈatsoojy: Ëjtsëts Jesús diˈib mijts mˈaxëktuumpy. Jyënany dëˈënë Jesús yëˈko ko yaˈaxëktunyë yˈëxpëjkpëty, dëˈën tjawë extëmxyëp yëˈë dëˈën yajtuny.

Saulʉ ta dyajtëëjy: ¿Tits ndunëp wintsën?

Jesús ta yˈatsoojy: Pëdëˈëk ets nëjx Damaskʉ. Jam myaˈanëëmët ti mdunëp. Ko Saulʉ pyëdeˈky ta ojts yˈijxwaˈxy, per kyaj ti tnekyˈijxpaty. ¡Të nety wyiintsë! Pääty ojts yajwijtsnejxy Damaskʉ.

Jesús ta ojts tmëgajxy tuˈugë yˈëxpëjkpë jam Damaskʉ diˈib xyëˈäjt Ananiiʉs ta tˈanmääjy: Tsoon, nëjx mä tadë tuˈu diˈib xyëˈäjtypy Tëytyuˈu. Mä Juudʉsë tyëjk jam xyajtëwët tuˈugë yetyëjk diˈibë xyëˈäjtypy Saulʉ. Tëts nwinˈixyë Saulʉ etsëts aduˈuk xymyëdunët.

Ananiiʉs ta myëdoojy ets tsyoˈony. Ta ko tpatyë Saulʉ ta tkëˈënikoony ets tˈanmääjy: Yëˈëts të xykyexyë Wintsën Jesús ets mˈijxpëkët jatëgok ets xyˈaxäjëdë Diosë jyot myëjää. Ta netyë mä ja wyiinë Saulʉ ojts kyaˈay extëmë äjkxë nyimeeny, ta jatëgok yˈijxpejky.

Saulʉ extëm kajaa ojts tyim tuunë, ojts yˈëwaˈxy kyäjxwaˈxy mä wiingatypyë nax käjpn, ta ojts yaˈixyˈäjnë extëmë apostëlë Pa̱a̱blʉ. Per minë net nˈokˈijxëm ti Dios tyuktuunë Peedrʉ ets ok ta net nijäˈäjëm tijatyë Pa̱a̱blʉ tyuun.