မြေကြီးပေါ်မှာလဲနေတဲ့လူ ဘယ်သူလဲမင်းတို့သိကြလား။ ရှောလုပဲကွဲ့။ မှတ်မိရဲ့လား။ သတေဖန်ကိုခဲနဲ့ပေါက်သတ်တဲ့လူတွေရဲ့ အဝတ်ကိုကြည့်ပေးတာ သူပဲလေ။ တောက်ပတဲ့အလင်းတန်းကြီးကို ကြည့်လိုက်ဦး။ ဘာဖြစ်နေတာလဲ။

သတေဖန်အသတ်ခံရတဲ့နောက် ရှောလုကခေါင်းဆောင်ပြီး ယေရှုနောက်လိုက်တွေကိုရှာပြီးဒုက္ခပေးတယ်။ တစ်အိမ်ပြီးတစ်အိမ်သွားပြီး သူတို့ကိုအိမ်ပြင်ဆွဲထုတ်တယ်၊ ထောင်ချတယ်။ တပည့်တော် တော်တော်များများ တခြားမြို့ရွာကိုပြေးကြတယ်။ ပြီးတော့ “သတင်းကောင်း” ကိုရောက်တဲ့နေရာမှာကြေညာကြတယ်။ ဒါပေမဲ့ ရှောလုက တခြားမြို့တွေကိုလည်းသွားပြီး ယေရှုနောက်လိုက်တွေကိုလိုက်ရှာတယ်။ ခုသူ ဒမာသက်မြို့ကိုသွားနေတာလေ။ ဒါပေမဲ့ လမ်းခုလတ်မှာ ထူးဆန်းတဲ့အဖြစ်အပျက်တစ်ခုနဲ့တိုးတယ်။

အလင်းရောင်တစ်ခုက ရှောလုအနီးတစ်ဝိုက်မှာ ဖြတ်ကနဲလက်သွားတယ်။ ရှောလု မြေပေါ်လဲကျသွားတယ်။ ပုံမှာပါတဲ့ အတိုင်းပဲပေါ့။ ပြီးတော့ အသံတစ်ခုပေါ်လာတယ်။ ‘ရှောလု၊ ရှောလု၊ ငါ့ကိုဘာဖြစ်လို့ ဒုက္ခပေးရတာလဲ’ ဆိုပြီးမေးတယ်။ ရှောလုနားမှာရှိတဲ့လူတွေ အလင်းကိုလည်းမြင်၊ အသံကိုလည်းကြားကြပေမဲ့ ဘာကိုပြောနေမှန်းကိုတော့မသိကြဘူး။

ရှောလုက ‘ကိုယ်တော်ဘယ်သူလဲ’ ဆိုပြီးပြန်မေးတယ်။

‘ငါဟာ မင်းနှိပ်စက်နေတဲ့ယေရှုပဲ’ ဆိုပြီး အသံရှင်က ပြန်ဖြေတယ်။ ယေရှုဘာဖြစ်လို့ ဒီလိုပြောရတဲ့အကြောင်းကတော့၊ ရှောလုက ယေရှုရဲ့နောက်လိုက်တွေကိုနှိပ်စက်တာဟာ သူ့ကိုနှိပ်စက်သလို ယေရှုခံစားရလို့ပဲကွဲ့။

‘ကျွန်တော်ဘာလုပ်ရမလဲ၊ သခင်’ ဆိုပြီးရှောလုကမေးတယ်။

‘ထပြီး ဒမာသက်မြို့ကိုသွားပါ၊ ဘာလုပ်ရမလဲဆိုတာ ဟိုကျသိရလိမ့်မယ်’ ဆိုပြီး ယေရှုကပြောလိုက်တယ်။ ရှောလုကထပြီး မျက်စိကိုဖွင့်ကြည့်တော့ ဘာကိုမှမမြင်ရတော့ဘူး။ သူမျက်စိကန်းသွားပြီကွဲ့။ ဒါနဲ့ သူ့ဘေးကလူတွေက သူ့လက်တွဲပြီး ဒမာသက်မြို့ကိုပို့လိုက်တယ်။

အဲဒီအချိန်မှာ ယေရှုက ဒမာသက်မြို့မှာရှိတဲ့ တပည့်တော်တစ်ယောက်ကိုပြောတယ်။ ‘ထပါ၊ အာနနိ။ လမ်းဖြောင့် လို့ခေါ်တဲ့ လမ်းကိုသွားပါ။ ယုဒရဲ့အိမ်ရောက်ရင် ရှောလုဆိုတဲ့လူတစ်ယောက်ကိုရှာပါ။ သူ့ကိုငါ့ရဲ့အထူးကျေးကျွန်တစ်အဦးအနေနဲ့ ငါရွေးကောက်လိုက်ပြီ’ တဲ့။

အာနနိက မှာတဲ့အတိုင်းလုပ်တယ်။ ရှောလုကိုသူတွေ့တဲ့အခါ သူ့အပေါ်မှာလက်တင်ပြီး ‘မင်းမျက်စိပြန်မြင်အောင်၊ သန့်ရှင်းသောဝိညာဉ်တော်နဲ့ပြည့်အောင်လုပ်ဖို့ ငါ့ကိုသခင်ဘုရားလွှတ်လိုက်တယ်’ ဆိုပြီးပြောတယ်။ ချက်ချင်းပဲ ငါးအကြေးခွံလိုလိုဟာတွေ ရှောလုမျက်စိကကွာကျလာတာနဲ့ ရှောလုမျက်စိပြန်မြင်လာတယ်။

လူအမျိုးမျိုးကိုဟောပြောတဲ့နေရာမှာ ရှောလုကို တွင်တွင်ကြီးသုံးတော့တယ်။ ရှောလုဟာ တမန်တော်ပေါလုဖြစ်လာတယ်။ သူ့အကြောင်း အများကြီးသိရဦးမယ်။ ဒါပေမဲ့ ဦးဦးဆုံး ဘုရားသခင် ပေတရုကိုလွှတ်ပြီး ဘာလုပ်ခိုင်းသလဲဆိုတာကို ကြည့်ရအောင်။