TLAPOUALISTLI 108

Ijkuak oyayaj Damasco

¿TIKMATI akin nin tlakatl tlen uetok ipan tlali? Ye Saulo. Ye okinpixtoka intlakeuan akinmej okimiktijkej Esteban ika tetl. ¡Xikita non tlauili tlen petlantok! ¿Tlen panotok?

Ijkuak okimiktijkej Esteban, Saulo okintemoto imachtijkauan Jesús pampa kintlajyouiltiskia. Okalakiaya inkalijtik, okinkixtiaya uan okinuikaya telpiloyan. Miakej imachtijkauan Jesús oyajkej itech oksekimej altepemej uan ompa otetlapouijkej itech iTlajtol toTajtsin Dios. Maski ijkon, Saulo okintemoto oksekimej imachtijkauan Jesús itech oksekimej altepemej. Axkan oyajki Damasco. Uan ijkuak oyaya ipan ojtli, opanok itlaj tlen tetlajtlachialtia.

San niman, se tlauili tlen oualaya itech iluikak okiyaualo Saulo. Saulo ouetski ipan tlali, ken nikan tikitaj. Ijkuakon, okikak akaj tlen okilui: ‘¡Saulo, Saulo! ¿Tleka tinechchiuilijtok tlen amo kuali?’. Tlakamej tlen oyayaj iuan Saulo okitakej non tlauili uan okikakej akaj otlajto, maski ijkon, amo okajsikamatkej tlen okijto.

Saulo okijto: ‘¿Akin te noTeko?’.

Jesús okilui: ‘Ne niJesús, akin tikchiuilijtok tlen amo kuali’. Ijkon okijto pampa Saulo okinchiuilijtoka tlen amo kuali imachtijkauan Jesús, uan Jesús okimachiliaya ye okitlajyouiltijtoka.

Saulo okitlajtlani: ‘¿Tlen moneki nikchiuas noTeko?’.

Jesús okilui: ‘Ximoketsa uan xio Damasco. Ompa tikmatis tlen tikchiuas’. Ijkuak Saulo omoketski uan okintlapo ixtololouan, amo itlaj ueli okitak. ¡Okipolo itlachialis! Ik non, tlakamej tlen okatkaj iuan okimatilankej uan okiuikakej Damasco.

Axkan, Jesús okinotski se imachtijka tlen okatka Damasco uan okilui: ‘Ximoketsa Ananías. Xio itech ojtli tlen itoka Recta. Itech ikalijtik Judas xiktemo se tlakatl tlen itoka Saulo. Onikpejpenki pampa yetos se kuali notekipano’.

Ananías okitlakamatki. Ijkuak okitak Saulo, ipan okitlali imauan uan okijto: ‘ToTeko onechtitlanki pampa uelis oksepa titlachias uan tikselis espíritu santo’. San niman, oualuetski itlaj ken kakapachtli, uan oksepa otlachixki.

Saulo sapanoa otlapaleui ijkuak okintlapoui tlaltikpaktlakamej itech miakej altepemej. Okixmatkej ken tlatitlanil Pablo, uan okachi timomachtiskej itech ye. Achto, ma tikitakan tlen okilui toTajtsin Dios ma kichiua Pedro.

Hechos 8:1-4; 9:1-20; 22:6-16; 26:8-20.