¿YACHANKICHU pitaq pampapi kuchparayachkan? Payqa Saulom. Paymá Estebanta rumiwan choqaparuqkunapa pachankuta cuidarqa. ¡Qaway llumpay achkiy kanchaykusqanta! ¿Imataq pasachkan?

Estebanpa wañusqan qepata Sauloqa Jesuspa qatiqninkunata ñakarichinanpaq qatikacharqa. Wasin-wasinta yaykuspa carcelman apaq. Hinaptinmi discipulokunamanta wakinninqa cheqerurqaku ichaqa mayman rispankupas “allin noticiakunata” willakuqku. Saulom ichaqa Jesuspa qatiqninkunata maskastin huklaw llaqtakunaman rirqa. Kaypiqa Damasco llaqtamanmi richkan. Ñanta richkaptinmi ichaqa admirakunapaq hina pasarqa:

Qonqayllamanta huk llipyay hina Saulota kanchaykurqa. Hinaptinmi qawasqanchikman hina pampaman wichiykurqa. Hinaspa kayna niqta uyarirqa: ‘¡Saulo, Saulo! ¿Imanasqataq ñakarichiwachkanki?’ nispa. Saulowan riqkunam chay achkiytaqa rikurqaku ichaqa manam entienderqakuchu rimamusqanpa nisqanta.

Chaymi Saulo nirqa: ‘¿Pitaq kanki Señor?’ nispa.

Hinaptinmi nimurqa: ‘Ñoqaqa ñakarichiwasqayki Jesusmi kani’ nispa. Jesuspa qatiqninkunata Saulo imatapas ruraptinqa, Jesusqa kikinta ruraruchkanmanku hina sientespanmi chaynata nirqa.

Hinaptinmi Saulo tapurqa: ‘¿Imatataq rurasaq Señor?’ nispa.

Jesusñataqmi nirqa: ‘Hatarispayki Damasco llaqtaman yaykuy, chaypim imam ruranaykita nisunki’ nispa. Sauloñataqmi pampamanta hatarispan manaña imatapas rikurqachu. ¡Ñawsayarusqa! Chaymi riqmasinkuna makinmanta aysaspanku Damasco llaqtaman chayachirqaku.

Jesucristom chay Damasco llaqtapi discipulon Ananiasta nirqa: ‘Ananias, hatarispayki. Riy Derecha sutiyoq calleman, hinaspayki Judaspa wasinpi Saulo sutiyoq runata maskamuy. Chay runataqa akllarqani ñoqamanta willakunanpaqmi’ nispa.

Ananiasñataqmi kasukullarqa. Saulota tariruspa hawanman makinta churaykuspan nirqa: ‘Señormi kachamuwarqa qamta qawarichinaypaq hinaspa chuya espiritupa huntasqan kanaykipaq’ nispa. Hinaptinmi chaypunilla Saulopa ñawinmanta escama hina wichirurqa, hinaspam qawakurqaña.

Hinaptinmi Sauloqa tukuy hinastinpi llapallan runakunaman Jesusmanta willakurqa. Tiempopa risqanman hina paytaqa apostol Pablo nispañam reqsirqaku, chaymantañam paymantaqa astawan yachasunchik. Ichaqa puntataraq qawasun Pedrota Dios kamachisqanmanta.